Jơnum tal 14 laih rơgao, Khul apăn bruă Ping gah hơmâo pơgôp hiăp kơ bruă ruah sa, dua kơ-iăng khua mir sir (mơnuih mă bruă rĭse), Khua pơ ala mơnuih ƀôn sang dêh čar tal XV hăng sang phat kơđi mă bruă gơnong glông rơwang thun 2021-2026 kiăng Ding jum kơđi čar lăi pơthâo amăng jơnum lok 10, Khua pơ ala mơnuih ƀôn sang dêh čar tal XV ruah tui tơlơi pơkă. Tui tơlơi pơkă, sang phat kơđi gơnong glông tơdơi kơ ruah amra pơsit ngă bruă ƀơi anăp Khua pơ ala mơnuih ƀôn sang dêh čar hăng boh tơhnal anai amra pôr pơhing, pơdah rup ƀơi anăp kiăng mơnuih ƀôn sang kiăo tui lăng.

Ăt tlam hrơi anun mơn, Khua pơ ala mơnuih ƀôn sang dêh čar pơčrông sai ƀơi sang jơnum kơ dua črăn tơlơi phăn mrô mơnuih ƀôn sang hăng tơlơi phiăn wai pơgang tơlơi duam ruă. Khua ding jum ia jrao amra lăi pơthâo rơđah brơi sa, dua Khua pơ ala mơnuih ƀôn sang. Tui jơlan hơdră ngă bruă amăng rơwang hrơi tơjuh anai, Khua pơ ala mơnuih ƀôn sang dêh čar pơsit hluai tui tơlơi pơtrun kơ akŏ bruă pơđĭ kyar bơwih ƀong huă-mơnuih mơnam thun 2026; tơlơi pơtrun kơ rơnoh prăk amra mă yua ngăn drăp thun 2026; tơlơi pơsit kơ bruă kah pơpha ngăn drăp thun 2026.