Hmư̆ tui tơlơi jak iâu mơng Khua git gai wai lăng pơ ala mơnuih ƀôn sang ơi Vương Đình Huệ, Khua git gai wai lăng pơ ala mơnuih ƀôn sang gơnong dlông dêh čar Kur Samdech Say Chhum ba jơlan hlâo Grŭp Khua pơ ala gơnong dlông dêh čar Kur nao truh laih pơ̆ plơi prong jưh jom Hà Nội, rai čuă sit nik dêh čar Việt Nam mơng lơ 24 truh lơ 26/10.

Khua Gơnong dlông pơ ala mơnuih ƀôn sang Kur Samdech Say Chhum

Anai lĕ bruă mă kơđi čar pơtôm hiăp yôm phăn kơplah wah Khua pơ ala mơnuih ƀôn sang Việt Nam hăng Khua pơ ala mơnuih ƀôn sang gơnong dlông dêh čar Kur amăng thun 2022 lĕ “Thun giăng mah Việt Nam – Kur, Kur – Việt Nam”, ƀrô djơ̆ tal hơdor glăi 55 thun hrơi pơjing bruă pơtom hiăp kơplah wah dua bôh dêh čar (24/6/1967), djru kơtưn tơlơi gum hrom, đăo gơnang nao rai bruă kơđi čar kơplah wah dua Ping gah, dua Kơnuk kơna hăng dua Ƀirô Khua pơ ala mơnuih ƀôn sang. Tal rai čuă mơng ơi Samdech Say Chhum anai kiăng dua bơnah bơkơtuai, pơsit kơ hơdôm bôh tơhnal gum hrom kơplah wah Ƀirô Khua pơ ala mơnuih ƀôn sang hơdôm hrơi rơgao, djru hơkrŭ đĭ hăng pơtrut tơlơi rô nao rai jê̆ giăm klă hiam, giăng mah mơng hlâo, gum hrom pơhlôm akô̆ tlôn, kơjăp phik sui thun kơplah wah dua bơnah./.