Tŏ tui hrơi mông jơnum lok 4, Khua pơ ala mơnuih ƀon sang dêh čar tal 15, mơguah (7/11), ƀing khua mua pơčrông sai ƀơi sang jơnum hăng 2 črăn tơlơi pơtrun kơ bruă: “Ngă lông lăng sa, dua hơdră akŏ phun kiăng pơđĭ kyar plơi prong Buôn Ma Thuột, tơring čar Dak Lak” hăng “ngă lông lăng bruă ruah blơi mă tui hluai hơmâo mrô rơdêh ôtô”. Hmư̆ hră lăi pơthâo kơ bruă pel ĕp črăn Tơlơi phiăn gah bơkơtưn man pơdong (čih pơkra glăi).

Bơkơtuai kơ črăn tơlơi pơtrun kơ bruă lông lăng sa, dua hơdră akŏ phun kiăng pơđĭ kyar plơi prong Buôn Ma Thuột, tơring čar Dak lak, ƀing khua mua lêng pơsit tong anai lĕ bruă kiăng pơjing, pơđĭ kyar plơi prong Buôn Ma Thuột jing anih phun pơtrut pơđĭ kyar kual Dap kơdư, yua anun hơdôm hơdră yôm phara anai kiăng pơhlôm kjăp hăng lăng nao sui thun pơ anăp. Pơ anăp anai, Kơnuk kơna amra pơjing hơdră yôm phara brơi kual Dap kơdư tui tơlơi pơtrun mrô 23 mơng Ding jum kơđi čar kơ jơlan hơdră pơđĭ kyar bơwih ƀong huă-mơnuih mơnam hăng pơhlôm hơđong amăng kual Dap kơdư truh thun 2030, anăp nao truh thun 2045, Kơnuk kơna amra kiăo tui lăng kiăng hơdôm hơdră anai dưi ngă tui sit nik, lăng glăi kiăng pơhrua brơi lăp djơ̆ dong.