Akŏ bruă pơkra ming ngă mơng kơnôl 20/9/2026, yua grup tuh tia pơkra ming-anom bruă dăng kông ling tơhan (Viettel) djru brơi. Truh ră anai, hơdôm ring bruă dưi ngă giăm 50% tui tơlơi pơkă. Mơng pel ĕp sit nik, Khua tơhan krên dên ơi Phan Văn Giang rơkâo hơdôm anom bruă bơdjơ̆ nao gum hrŏm kjăp, pơtrut tañ bruă man pơkra, pơhlôm brơi klă, hiam hăng ngă brơi djơ̆ ha amăng plĕ hơdôm ring bruă; đing nao ngă hiam jum dar, anih hơ-ŭ hơdor, gir run pơgiong hlâo kơnôl 22/12/2026.

Khua tơhan lăi pơtong, bruă pơkra ming pơsat pơdah gru hơdip “Mơñum ia hơdor kơ pô klơi”, tơlơi glăm ba hăng pran khăp pap mơng rơnuk tơdơi hăng ƀing djai pơsăn drơi yua kơ tơlơi rơnuk rơnua, rơngai lŏn ia ta. Ring bruă tơdơi kơ man pơkra giong amra pơhlôm klă ƀiă anih hơ-ŭ hơdor kơ ƀing tơhan djai pơsăn drơi, laih dong pơgôp pơtô glăi gru grua ngă hơkrŭ, pơtrut pran khăp lŏn ia hăng wai pơgang lŏn ia mơng rơnuk tơdơi.