Pơkă hnơ̆ng man pơdong plơi prong Ƀuôn Ma Thuôt truh pơ thun 2050 tơdơi adih prong rơhaih năng ai 37.738 hektar, hơmâo ling pơkă guai phun kơ 5 boh phường: Ƀuôn Ma Thuôt, Tân An, Tân Lập, Thành Nhất, Ea Kao hăng să Hòa Phú. Tơhnal pơkă lĕ, man pơdong Ƀuôn Ma Thuôt jing anih phun, anih ngă sa bruă hmư̆ hing hăng gưl tơring čar; anŏ pơtruh nao rai plah wah kual Dap Kơdư hăng hơdôm anih ter hang ia rơsĭ Dơnung Tong krah. Plơi prong phrâo pơgang anŏ tơ-ui mơtah mơda hla kyâo lu, anih dŏ rơ-ơ̆ hiam klă, rơgoh hơdjă, phrâo hloh, djă pioh tong ten gru grua hiam đưm laih anun bong glăi hăng anŏ ngă pơblih ayuh hyiăng lơ̆n tơnah.

Sa amăng hơdôm tơlơi lăp đing nao mơ̆ng bruă pơkă hnơ̆ng anai, pơphun glăi anih man pơdong plơi prong, pok jơlan phrâo jing 6 bit anih prong phun, 9 anih sa ƀut pơtum, 2 arăt jơlan phun hăng 2 arăt jơlan ter pơđĭ kyar. Amăng anun phường Ƀuôn Ma Thuôt, jing anih phun, tong krah plơi prong, hăng lu anih phun jum dar pơlir hơbit, ngă rai lu anŏ hiam plơi prong rơnuk phrâo, hăng hơmâo anŏ ba yua, ngă bruă phara hơjăn. Phường Tân An pơđĭ kyar sĭ mơdrô, bơwih bơwăng, pơtô hrăm hăng anih mơnuih ƀôn sang dŏ jing ƀing pơdrong hloh; phường Tân Lập jing plơi prong  gah ngŏ. Phường Ea Kao lăng kơ dơnao ia kao anun ngă anŏ phun pơđĭ kyar čơkă tuai hyu ngui dŏ glăi amăng anih hiam rơgoh hơdjă, rơ-ơ̆ rơ-iŏm plơi pla, hmua pơdai, kyâo pơtâo. Să Hòa Phú lĕ pơđĭ kyar bruă tuh tia pơkra ming gơnam pơgang anŏ rơgoh hơdjă, ngă tui logistics pơjing gơnam sĭ mơdrô boh troh đang hmua.

Hăng bruă pôr pơthâo hnơ̆ng pơkă man pơdong plơi prong Ƀuôn Ma Thuôt truh thun 2050 tơdơi adih jing atur yom biă mă pioh kơ Dak Lak hăng djop plơi pla, tơring tơrang pơđĭ kyar, pok prong plơi prong hăng pơhưč tuh pơ alin. Ơi Đỗ Hữu Huy, Khua Jơnum min mơnuih ƀôn sang tơring čar Dak Lak lăi, pơkă hnơ̆ng plơi prong Ƀuôn Ma Thuôt truh thun 2050 ƀu kơnong sem lăng hlâo sui thun pơ anăp adih đôč ôh, man pơdong plơi prong phrâo, anih phun tong krah kual Dap Kơdư, či pơtruh nao rai hăng hơdôm tơring amăng kual ter hang ia rơsĭ Dơnung Tong krah.

“Tơring čar hơmâo pôr pơthâo akŏ bruă lĕ lir hơbit hăng bruă pơphun ngă tui tŭ yua, pơtum jak iâu tuh pơ alin prăk kăk, ba yua hơdôm anŏ gêh găl hăng pơgang sa hnơ̆ng, hơđong kơjăp. Boh tơhnal mơ̆ng bruă pơkă hnơ̆ng anai ƀu kơnong kơnang kơ anŏ lăng nao pơ anăp adih sui thun đôč ôh, dŏ kơnang kơ tơlơi thâo amăng pơphun či ngă. Rĭm jơlan hơdră khom ngă pơrơđah hloh hăng bruă ngă, tơlơi ƀuăn rơ̆ng khom ngă tui tum teč khom ƀuh hơmâo boh tŭ yua sit nik, rĭm anŏ gêh găl či pơđĭ kyar dưi lăi pơthâo rơđah bruă ngă tui, jing pran kơtang rơnoh pơđĭ kyar phrâo”.

Pơkă hnơ̆ng abih bang kơ plơi prong Ƀuôn Ma Thuôt truh thun 2050, pok brơi anŏ lăng nao pơ anăp sa anih anom lơ̆n mơnai adai rơhuông phrâo prong hloh man pơdong prong phun tong krah Dap Kơdư. Kiăng dưi ngă tui tơlơi kiăng, rơnoh pơkă hnơ̆ng anai, sa tơlơi yom hloh lĕ khom gir run pran jua pơphun ngă tui, pơtum pran jua hăng pok pơhai ngă tui rĭm akŏ bruă, rĭm yak ngă man pơdong Ƀuôn Ma Thuôt jing plơi prong mơtah mơda tơ-ui kyâo lu, samơ̆ phrâo hloh, djă pioh gru grua hiam lăp hăng tơlơi pơlir hơbit amăng kual pơđĭ kyar hrŏm.