Ƀơi să Ia Chía, tơring glông Ia Grai, tơring čar Gia Lai, Khul hlăk ai dêh čar ta hmâo ƀơk laih 350 anung gơnam kơ hơdôm bôh sang anô̆ lĕ mơnuih mă bruă kơ sang bruă hmâo tơlơi hơdip tơnap, čơđai lĕ djuai ania ƀiă hrưn đĭ amăng bruă hrăm hră... Rim anung gơnam hmâo nua 700.000 prăk, amăng anun hmâo prăk hăng hơdôm gơnam kiăng yua rim hrơi. Hluai tui Jơlan “Tết gum djru, thun ania jơgrai pơplih phrâo” Khul hlăk ai dêh čar ta čang rơmang ngă tui dong phiăn juăt gum djru tơdruă, “gum djru, khăp păp”, gum hrŏm hơbit, jum ba, djru gum mơ̆ng djuai ania. Hơdôm gưl khul gum hrŏm klă dong, hmâo dong lu bruă mă tŭ yua, gum hrŏm hăng hlăk ai tơdăm ngek dra muai, čơđai mua hmâo tơlơi hơdip mơda tơnap tap, biă ñu amăng tal Tết tui phiăn juăt, djru pơjing pran pơtrut pioh ƀing gơyut hlăk ai, tơdăm dra, mơnuih mă bruă gir run hrưn đĭ dong amăng bruă bơwih ƀong huă. Hmâo mă tơlơi gum djru mơ̆ng jơlan hơdră, ayong Rmah Ky, ƀơi plơi Kon Yô̆, să Ia Chía, lăi:

  “Bơni kơ hơdôm bôh ƀirô anom bruă hmâo lăng ba hăng ƀơk gơnam tam, tŭ yua biă hăng plơi pla, čang rơmang dưi lăng ba hloh dong mơ̆ng hơdôm gưl, hơdôm gơnong bruă truh hăng să kual ataih, asuek, kual tơnap tap mơ̆ng tơring glông”.

 Ƀrô djơ̆ tal anai, khul hyu mă bruă mơ̆ng Khul hlăk ai rơnuk Hồ Chí Minh dêh čar ta hrŏm hăng Khul hlăk ai tơring čar Gia Lai hmâo nao čuă, pơsur khul ling tơhan pơgang guai dêh čar ƀơi puih kơđông Ia Chía, tơring čar Gia Lai.

Gia Lai lĕ anih anom tal 13 amăng mrô 25 bôh tơring čar, ƀôn prong mơ̆ jơlan hơdră “Tết gum djru, thun ania jơgrai pơplih phrâo” găn rơgao hăng rơbêh kơ 10.400 anung gơnam Tết amra ƀơk kơ mơnuih mă bruă kơ sang bruă bơbeč djơ̆ yua hrŏ trun bruă ba truh mơ̆ng klin ngă, mơnuih hyu mă akan hơdang bưp lu tơlơi lông yua kơ pơplih ayuh hyiăng hăng ling tơhan pơgang guai dêh čar.

 Ăt amăng rơwang hrơi tơjuh rơgao mơn, Khul hlăk ai rơnuk Hồ Chí Minh dêh čar ta gum hrŏm hăng Khul hlăk ai tơring čar Kon Tum pơphun Jơlan hơdră “Bơyan bơnga guai dêh čar – Tết bul ia rơsĭ” ƀrô djơ̆ tal Tết Giáp Thìn 2024 ƀơi 2 bôh tơring glông guai dêh čar ƀơi Ia H’Drai hăng Sa Thầy.

 Ƀơi tơring glông guai dêh čar Ia H’Drai, tơring čar Kon Tum, Grŭp git gai Khul hlăk ai rơnuk Hồ Chí Minh dêh čar ta hmâo jao laih hơdră bơwih ƀong hmâo nua 2 klai prăk djru ngăn rơnoh pioh mơnuih amăng khul hlăk ai, tơdăm dra ƀơi anai pơđĭ kyar bơwih ƀong; ƀơk 20 anung prăk djru hrăm hră, rim anung hmâo nua 2 klăk prăk kơ ƀing čơđai sang hră ƀun rin hrăm hră rơgơi; ƀơk 30 anung gơnam kơ mơnuih mă bruă gah Sang bruă bơwih ƀong mơnuih ƀôn sang Sa ding kơna Kơ su Čư̆ Mo Ray hăng Sang bruă Kơ su Sa Thầy. Ayong Ngô Văn Cương, Khua git gai Khul hlăk ai dêh čar ta, Khua Jơnum min pel ĕp bruă Khul hlăk ai, brơi thâo:

 “Hluai tui hơdôm bruă mă anai kiăng djru mơnuih mă bruă, hlăk ai mă bruă ƀơi sang bruă, mơnuih hmâo tơlơi hơdip mơda tơnap tap hmâo tơhnal gal pioh glăi plơi ƀong Tết pơđao pran jua hloh, sang anô̆ mơ-ak mơ-ai hloh. Tơdơi kơ Tết amra hmâo pran jua klă pioh djru mơnuih mă bruă ăt kah hăng hlăk ai mă bruă kơ sang bruă hăng hlăk ai hmâo tơlơi hơdip mơda tơnap tap mă bruă klă hloh dong lơm mơ̆ čơkă Tết pơđao pran jua”.

Ƀơi Jơlan hơdră “Bơyan bơnga guai dêh čar – Tết bul ia rơsĭ” nao hrŏm hăng bơwih brơi Tết kơ hlăk ai mă bruă kơ sang bruă, mơnuih mă bruă dưi pơphun ƀơi să Mô Rai, tơring glông Sa Thầy, Grŭp git gai Khul hlăk ai rơnuk Hồ Chí Minh dêh čar ta ƀơk 20 anung gơnam kơ mơnuih hmâo arăng đăo gơnang amăng neh wa djuai ania ƀiă; ƀơk 2 per măi kompiutơr, loa ba hyu kơ Khul hlăk ai să Mô Rai. Ƀrô djơ̆ tal Tết tui phiăn juăt mơ̆ng djuai ania, Grŭp git gai Khul hlăk ai rơnuk Hồ Chí Minh dêh čar ta hrŏm hăng Khul hlăk ai tơring čar Kon Tum ăt nao čuă mơn, hơ-ưč hmưi Tết pơsur pran jua, ƀơk hơdôm gơnam tŭ yua kơ mơnuih apăn bruă tơhan, tơhan kông ang să Ia Dom hăng Puih kơđông pơgang gui dêh čar Ia Dom, tơring glông Ia H’Drai.

Pơhiăp ƀơi Jơlan hơdră, Khua git gai Khul hlăk ai dêh čar ta Ngô Văn Cương brơi thâo Jơlan hơdră “Bơyan bơnga guai dêh čar – Tết bul ia rơsĭ” lĕ bruă mă rim tal dưi hmâo Grŭp git gai Khul hlăk ai dêh čar ta pơphun amăng tal giăm Tết tui phiăn juăt. Jơlan hơdră kiăng lăi pơhing hyu, pơtô pơhrăm, pơđĭ tui tơlơi pơmin kơ mơnuih amăng khul, tơdăm dra, tơdăm ngek dra muai, čơđai muai kơ tơhnal yôm phăn mơ̆ng guai dêh čar amăng pơđĭ kyar bơwih ƀong, mơnuih mơnam, pơgang rơnuk rơnua guai dêh čar; ngă tui pran jua gum djru tơdruă, bơwih brơi, djru mơnuih apăn bruă khul, tơdăm ngek dra muai čơđai muai, mơnuih ƀôn sang hmâo tơlơi hơdip tơnap tap ƀrô djơ̆ tal tết tui phiăn juăt. Ayong Ngô Văn Cương ăt rơkâo mơn Grŭp apăn bruă Khul hlăk ai tơring čar Kon Tum črâo ba hơdôm gưl khul amăng tơring čar lăi pơhing hyu dong kơ jơlan hơdră anai pioh lar hyu hơdôm bruă mă tŭ yua yôm amăng hơdôm hrơi rơnuč thun, prăp lui čơkă tết./.