Khul khua hơmâo sem lăng kiăng ơi Đinh Tiến Dũng, Ding kơna Ding jum kơđi čar, Khua grup pơ ala mơnuih ƀôn sang dêh čar tal 15 ƀôn prong Hà Nội lui hĭ ngă khua, pơdơi bruă mă. Tui hăng tơlơi lăi pơthâo mơ̆ng Jơnum min Pel ĕp kơđi tơlơi Kơnuk kơna, amăng hrơi blan ngă ding kơna Khul djru bruă ping gah, Khua ding jum prăk kăk rơwang thun 2016-2021, ơi Dũng ngă soh Tơlơi pơkă kơ hơdôm tơlơi mơnuih ping gah ƀu dưi ngă, Tơlơi pơkă mơnuih gơgrong bruă, Tơlơi pơkă ngă bruă; ƀu glăm bruă, ƀu git gai klă ôh, pioh Khul djru bruă Ping gah, Ding jum prăk kăk hăng hơdôm anom bruă, hơjăn pô hơmâo lu tơlơi soh glăi, ba truh tơlơi sat răm prong, mơnuih ƀôn sang hmư̆ hing ƀu klă, jing lu mơnuih ƀu đăo kơnang kơ ping gah, anom bruă kơnuk kơna. Ƀuh rơđah tơlơi gơgrong bruă ƀơi anăp Ping gah hăng Mơnuih ƀôn sang, ơi Dũng čih hră rơkâo pơdơi bruă hơmâo jao hăng pơdơi bruă hlao. Kiăo tui tơlơi phiăn mơ̆ng Ping gah, Kơnuk kơna sem lăng tơlơi rơkâo mơ̆ng ơi Đinh Tiến Dũng, Khul khua apăn bruă git gai Ping gah dêh čar ta tŭ ư brơi ơi Đinh Tiến Dũng pơdơi ngă Ding kơna Ding jum kơđi čar, Ding kơna Khul khua apăn bruă git gai Ping gah dêh čar tal 13.

Khul khua apăn bruă git gai Ping gah pơgôp hiăp kơ bruă ruah khua kiăng Ding jum kơđi čar pơsit ba pơƀuh pơ Khua mua pơ ala mơnuih ƀôn sang dêh čar tal 15 ruah pơhrua Ding kơna Jơnum min apăn bruă phun pơ ala mơnuih ƀôn sang dêh čar tal 15, rơwang thun 2021-2026.