VOV4.Jarai - Tom brơi (lơ 10/10), Khul khua pơ ala mơnuih ƀon sang dêh čar tơring čar Dak Lăk bưp ƀing kơ tri hlâo kơ mông jơnum lok 4, Khua git gai pơ ala mơnuih ƀon sang dêh čar tal 15 ƀơi hơdôm boh tơring glông Krông Ana, Čư̆ Kuin, Ea Sup hăng Buôn Đôn. Lu bruă djru tơlơi hơdip mơnuih ƀon sang hơmâo rơkâo hăng khua mua. Ƀơi anih bưp, Khul khua pơ ala mơnuih ƀon sang dêh čar tơring čar Dak Lăk lăi pơthâo hăng abih bang mơnuih ƀon sang hơdôm jơlan hơdră hơmâo ngă ƀơi mông jơnum lok 4, laih dong pơhmư̆ tơlơi pơgôp hiăp, tơlơi rơkâo mơng mơnuih ƀon sang mơ-it kơ khua mua pơ ala mơnuih ƀon sang tal anai.

Lăng ba bruă rŭ glăi hăng pơđĭ kyar bơwih ƀong huă - mơnuih mơnam, kơ tri ( mơnuih ruah khua) ƀơi Dak Lăk lăi, Kơnuk kơna kiăng hơmâo hơdră pơsir bruă đah mơng ngă hơđong nua gơnam, hơđong anih sĭ mơdrô laih anun djru pơsir brơi tơlơi tơnap kơ bruă pơkra gơnam, sĭ mơdrô mơng anom bơwih ƀong hăng mơnuih ƀon sang. Djă pioh hăng lăng yôm hơdôm tơlơi pơgôp hiăp mơng kơ tri, khul khua pơ ala mơnuih ƀon sang dêh čar ƀơi Dak Lăk kiăng hơdôm anom bruă dưi pơsir hăng gong gai plơi pla lăi pơthâo glăi. Hăng hơdôm bruă pơkŏn, khua mua amra tum pơƀut, rơkâo hăng Khua mua pơ ala mơnuih ƀon sang dêh čar, Kơnuk kơna hăng hơdôm Ding jum, anom bruă amăng tal jơnum pơ anăp.

Siu H’Mai: Pơblang