Amăng jơnum anai, ơi Lý Minh Thái- Khua gơnong bruă ia jrao tơring čar Gia Lai hơmâo 64/67 pok hră dong yua ruah ding kơna Jơnum min mơnuih ƀôn sang tơring čar. Hlâo anun, tong krah blan 3/2024, ơi Thái hơmâo Jơnum min mơnuih ƀôn sang tơring čar Gia Lai ruah ngă Khua gơnong bruă ia jrao. Ơi Lý Minh Thái thun tơkeng 1974, hrăm truh ơi ia jrao Chuyên khoa II; Boh thâo kơđi čar gưl prong, mă bruă amăng gơnong bruă ia jrao dong mơng thun 1998 ƀơi sang ia jrao tơring glông Chư Pah.

Ăt amăng jơnum anai, 100% mrô khua mua amăng Khul pơ ala mơnuih ƀôn sang tơring čar Gia Lai plĕ hră tŭ ư brơi pơdơi bruă hăng Khua khul djuai ania (gah Khul pơ ala mơnuih ƀôn sang tơring čar) hăng brơi pơdơi bruă ding kơna Khul pơ ala mơnuih ƀôn sang tơring čar hăng yă Đinh Thị Giang yua ngă soh hăng hơdôm tơlơi pơkă mơng Ping gah ƀu dưi ngă; ngă soh amăng hơdôm tơlơi pơkă amăng wai lăng, mă yua prăk kak pơgang klin Covid-19 ƀơi Jơnum min djop djuai ania mơnuih mơnam Việt Nam.