Tui hăng hră lăi pơthâo mơ̆ng Ding jum Pơtô hăng Pơjuăt, tal pơplông abih anih 12 thun 2024 dưi pơphun hơđong mơ̆n kah hăng mơ̆ng thun 2020-2023. Bruă mă ĕp lăng mông pơplông amra pơphun amăng hơdôm hrơi lơ 26, 27 hăng 28/6, bruă čom puang dưi ngă tui hăng akŏ bruă hrŏm abih bang mơ̆ng lơ 29/6 truh lơ 14/7, pôr pơthâo boh tơhnal tal pơplông mơ̆ng 8 mông mơguah lơ 17/7 ƀơi anom bruă Ding jum Pơtô hăng Pơjuăt laih anun ƀơi 63 boh tơring čar, ƀôn prong amăng dêh čar.

Mrô čơđai čih anăn pơplông thun anai hơmâo 1 klăk 71 rơbâo čô amăng djop 63 boh tơring čar, ƀôn prong, amra hơmâo 200 rơbâo čô nai hăng mơnuih mă bruă amăng anom bruă pơtô hrăm, tơhan kông an, ling tơhan blah ngă, ƀing ngă bruă gah ia jrao, anom bruă apui lơtrik gum hrŏm djru kơ tal pơplông. Kơ-iăng Khua dêh čar ơi Lê Thành Long pơtrun hiăp brơi Ding jum Pơtô hăng Pơjuăt laih anun hơdôm ding jum anom bruă ƀơi gơnong dlông ngă hrŏm tong ten pioh hơdai gum hrŏm djop tơring čar pơsir mơtam sit hơmâo tơlơi hơgĕt thâo ƀu găl, laih dơ̆ng ngă gêh găl klă hloh kơ čơđai sang hră pơplông.