Să Ea Ƀung dưi akŏ pơdong glăi, pơmut dua boh să hơđăp, prong rơhaih 390 km karê, mrô mơnuih 9.700 čô. Să mă bruă hruaih, gong gai kơnuk kơna tui glông bruă dua gưl ƀơi tơring čar; mrô hră pơar dưi pơsir djơ̆ hrơi pơkă hăng giong hlâo kơ hrơi pơkă truh 99%. Khă tui anun, să ăt dŏ tơlơi kơƀah, tơnap tap, jơlan glông nao rai aka ƀu klă, bơnư̆ pơkong ia răm laih, ngă tơnap amăng bruă ngă hmua, tơlơi bơwih ƀong huă mơ̆ng mơnuih ƀôn sang, mrô sang anŏ ƀun rin hăng giăm ƀun rin dŏ truh rơbêh 35%.

Ƀơi mông mă bruă, Kơ-iăng khua dêh čar, ơi Hồ Quốc Dũng lăi pơtong, Ea Ƀung lĕ anih giăm guai dêh čar, boh nik ñu jơlan glông nao rai, bơnư̆ pơkong ia kiăng đing nao, đah mơ̆ng dưi pơsir tơlơi tơnap tap kơ mơnuih ƀôn sang. Kơ-iăng khua dêh čar brơi jŭ yap glăi, dăp bruă mă hơbôt hloh, pơđĭ tui boh tŭ yua amăng bruă mă mơ̆ng gong gai kơnuk kơna plơi pla, pơtrut ba yua ia rơgơi mrô, pơblih hơdră ngă hră pơar, ngă gêh găl brơi kơ mơnuih ƀôn sang, ngă pơrơđah tui yua hơgĕt mơnuih ƀôn sang dŏ ƀun rin, kiăng hơmâo hơdră djru ba mơnuih ba mơnuih ƀôn sang.