Kơ-iăng khua dêh čar bơni biă kơ Ding jum Djuai ania hăng Tơlơi đăo hơmâo lu tơlơi gir amăng bruă hơmâo jao, biă ñu tơdơi kơ dăp glăi anom bruă. Kơ hơdôm bruă kiăng kơđiăng lui pơ anăp, Kơ-iăng khua dêh čar ơi Hồ Quốc Dũng kiăng čih pơkra giong tơlơi phiăn, amăng anun čih hơdră djru hăng ƀing čơđai sang hră gưl anet prong djuai ania ƀiă, sem lăng čih pơkra hơdră djru bruă mă, pơđĭ tui bruă bơwih bơwang, pơtruh mơnuih mă bruă hăng bruă mă amăng kual mơnuih ƀôn sang djuai ƀiă đah mơ̆ng pơđĭ tui klă hloh tơlơi hơdip neh met wa.

Kơ-iăng khua dêh čar ăt kiăng Ding jum Djuai ania hăng Tơlơi đăo khut ngă tui bruă pơhrŏ trun, ngă amuñ tui hră pơ-ar ngă bruă hlâo lơ 20/4; lăng glăi bruă kah pơpha gưl ngă bruă, anih dưi pơsir bruă lơ̆m kiăo tui gong gai 2 gưl. Hăng jơlan hơdră dêh čar pơtrun kơ djuai ania ƀiă khŏm lăng glăi tong ten, abih bang, pơhlom hơmâo brơi prăk či ngă bruă, tuč rơnuč ñu lĕ kiăng hơmâo anŏ tŭ yua./.