Mơguah tom brơi (15/9), tui tơlơi git gai mơng Ding kơna Ding jum kơđi čar, Khua git gai Ping gah ƀôn prong Hồ Chí Minh Nguyễn Văn Nên, Jơnum bơwih ƀong huă ƀôn prong Hồ Chí Minh thun 2023 hơmâo pơphun hăng anăn “Kơtưn pơđĭ kyar mơtah-Thun blan anăp nao pơhrŏ trun asăp sat dŏ 0”. Kơ-iăng khua dêh čar ơi Lê Minh Khái nao jơnum hăng đĭ pơhiăp amăng mông jơnum. Amăng tơlơi pơhiăp git gai jơnum, ơi Lê Minh Khái lăng bruă “Kơtưn pơđĭ kyar mơtah-Thun blan anăp nao pơhrŏ asăp sat dŏ 0” lĕ anăn pơphun sit nik hăng yôm phăn, lăp djơ̆ hăng tơlơi yak nao pơđĭ kyar hơđong kjăp ră anai amăng rŏng lŏn tơnah.

Jơnum tum pơƀut glăi ƀing rơgơi kơhnâo đăo gơnang amăng lŏn ia hăng tač rơngiao, amra pơgôp hơdôm tơlơi pơplih phrâo, hơdră bruă lăp djơ̆, hơdôm tơlơi găn rơgao yôm phăn kiăng djru brơi ƀôn prong Hồ Chí Minh amăng pok pơhai tŭ yua hơdôm hơdră bruă, tơlơi črâo trun mơng Ping gah, Kơnuk kơna amăng pơđĭ kyar mơtah hăng hơđong kjăp.