Čơkă jum ơi Charles R.Kaye, Khua git gai kông ty Warburg Pincus, sa amăng hơdôm anom bruă keh prăk tuh pơ alin mrô sa dêh čar Mi rai čuă hăng mă bruă ƀơi Việt Nam, Kơ-iăng khua dêh čar ơi Lê Minh Khái lăi rơđah, Việt Nam lăng kơ dêh čar Mi lĕ sa amăng hơdôm bơnah ngă hrŏm prong. Lăng yôm bruă kông ty Warburg Pincus ngă hrŏm hăng lu sang bruă sĭ mơdrô ƀơi dêh čar Việt Nam, Kơ-iăng khua dêh čar čang rơmang anom bruă Warburg Pincus ăt kơsem min, pok pơhư prong hloh bruă mă ngă hrŏm djop sang bruă sĭ mơdrô pơprong ƀơi Việt Nam, tuh pơ alin amăng bruă mă phrâo hloh.

Rơkâo anom bruă Warburg Pincus hăng lu anom bruă ngă hrŏm amăng rŏng lŏn tơnah lăi pơthâo lu anom bruă sĭ mơdrô mơ̆ng dêh čar Mi lăi pha, hơdôm dêh čar tač rơngiao hnun mơ̆n, amra tuh pơ alin lu hloh ƀơi Việt Nam. Pơ anăp, anom bruă keh prăk tuh pơ alin dêh čar Mi či ngă, tui hăng ơi Charles R.Kaye lăi, ră anai dŏ lu anom bruă sĭ mơdrô dêh čar Mi kiăng rai tuh pơ alin ƀơi Việt Nam, jing anih anom sĭ mơdrô lu tơlơi gêh găl; laih dơ̆ng lăi pơthâo tơlơi rơkâo hăng khua mua kơnuk kơna Việt Nam đing nao.