VOV4.Jarai-Tlam lơ 25/9, Kơ-iăng Khua dêh čar ơi Lê Văn Thành git gai jơnum lăng nao rai amăng tivi pok pơhai bruă bong glăi kơthel Noru. Tui hăng ơi Trần Hồng Thái, Khua anom bruă pơkă lăng ayuh hyiăng dêh čar, kơthel Noru hlăk pưh rai pơ kual ia rơsĭ Ngŏ dêh čar laih anun jing kơthel tal 4 ƀudah juăt lăi mrô 4 amăng thun anai.

Kơ-iăng Khua dêh čar ơi Lê Văn Thành git gai bong glăi kơthel Noru

Anai lĕ kơthel kơtang biă mă amăng 20 thun giăm anai aka ƀu hơmâo djơ̆ ôh, bơbeč djơ̆ pơ kual Tong krah dêh čar. Pơhiăp ƀơi mông jơnum, Kơ-iăng Khua dêh čar ơi Lê Văn Thành pơtrun hiăp pơtrun hiăp djop ding jum anom bruă, djop tơring čar khom prăp lui hlâo ngă tui bruă pơđuăi mơnuih ƀôn sang mơ̆ng anih hŭi rơhyưt. Ding jum ling tơhan, ding jum jơlan glông brơi jŭ yap glăi ngă hrom djop tơring čar jak iâu hơdôm ƀattô dŏ mă akan hơdang amăng ia rơsĭ glăi kơđap ƀơi anih rơnuk rơnua, pơgang kơ mơnuih ƀôn sang bĕ hĭ kơthel, anăm brơi hơmâo tơlơi truh răm ƀăm kơtang.

Jing tơring čar gah kual pơngŏ Dap Kơdư, tơring čar Kon Tum amra glăm ba tơlơi truh kơthel Noru ngă. Kiăng pơgang kơthel, Jơnum min mơnuih ƀon sang tơring čar Kon Tum hơmâo hră git gai djŏp plơi pla, anom apăn bruă hăng anom wai lăng dơnao ia, sang măi apui lơtrik pơƀut pơgang hlâo. Tui anun, Khua Jơnum min mơnuih ƀon sang tơring čar Kon Tum ơi Lê Ngọc Tuấn kiăng Jơnum min mơnuih ƀon sang hơdôm boh tơring glông, plơi prong hăng hơdôm gơnong bruă pơphun pơgang kơthel tui tơlơi pơtrun “4 ƀơi anih” tui hluai kơ kơthel tơdu rơnang hiư̆m pă, laih anun lăi pơthâo glăi tañ kiăng mơnuih ƀon sang thâo pơgang hlâo.

Hơdôm boh tơring glông, plơi prong akŏ pơdong grup hyu pel ĕp, sem lăng anih plơi pla dŏ ter hang ia krông, ter dơnao ia, anih plung, amuñ hơmâo ia dăo, ia kuor, lŏn tơhlŏm đah mơng thâo ba pơđuăi ană plơi lơ̆m hơmâo tơlơi truh.

Nay Jek-Siu H’Mai: Pơblang