VOV4.Jarai - Yua bơdjơ̆ nao mơng kơthel mrô 4, dong mơng mlăm lơ 27/9 truh lơ 28/9, hơdôm tơring čar Quảng Trị, Thừa Thiên Huế, Đà Nẵng, Quảng Nam, Quảng Ngãi, Kon Tum hơjan prong bă mă mơng 250-350 mm, đa hơmâo anih rơbêh 450 mm. Hơdôm tơring čar Quảng Bình, Bình Định, Gia Lai hơmâo hơjan prong mơng 100-200 mm, đa hơmâo anih rơbêh 300 mm. Truh mơguah lơ 28/9, kơthel mrô 4 hơmâo mut nao laih amăng rŏng lŏn ngă angĭn pưh kơtang ƀơi hơdôm tơring čar Quảng Trị, Đà Nẵng, Quảng Nam, Quảng Ngãi, Bình Định, Phú Yên, Kon Tum hăng Gia Lai, tơdơi anun, kơthel pưh nao pơ kual Dơnung Lào hăng tơdu trun jing hơjan hlim.

Amăng mông jơnum Khul git gai bruă pơgang kơthel mrô 4 mơmŏt tom brơi (27/9), Kơ-iăng Khua dêh čar ơi Lê Văn Thành pơtă pơtăn, kơthel anai kơtang biă mă pưh rai kơtang gưl 13, 14 hăng kơtang hloh lĕ gưl 17, kiăo tui anun hơjan prong. Yua anun, kiăng đing nao, pơƀut glăi djop anom bruă, khul grup mơng gơnong glông truh pơ ƀon lan pok pơhai hơdôm hơdră bruă kiăng kơ djru brơi mơnuih bưp tơlơi truh sat. Pơhlôm bong glăi kơthel mrô 4 hăng pran jua ječ ƀiă dong, pơhlôm brơi ană mơnuih, kông ngăn gơnam tam, lăng ană mơnuih lĕ yôm hloh, anăm brơi mơnuih ƀon yua kơ dram gơnam mơ̆ ba truh tơlơi truh sat.

VOV.VN

Siu Đoan: Pơblang