VOV4.Jarai-Tlam lơ 18/10, Kơ-iăng Khua dêh čar ơi Lê Văn Thành nao sem lăng bruă mă pơsir tơlơi răm ƀăm truh ia ling dăo ngă ƀơi tơring čar Quảng Trị. Kơ-iăng Khua dêh čar nao ĕp lăng, git gai bruă mă pơsir anih lŏn tơhlom, răm kơtang jơlan dêh čar mrô 15D, nao pơ anih guai dêh čar amăng jang jar kmar La Hay, črăn găn nao pơ să A Ngo, tơring glôngĐak Krông.

Črăn jơlan răm tơ̆i đưn  ƀơi jơlan dêh čar mrô 15D nao pơ amăng jang jar kmar La Hay

Kơ-iăng Khua dêh čar ơi Lê Văn Thành git gai tơring čar Quảng Trị hăng hơdôm anom bruă tañ pơsir, rŭ pơkra glăi jơlan, ƀudah čuk jơlan rô nao rai jăng jai, kiăng rơdêh dưi nao rai pơ amăng jang guai dêh čar hăng jar kmar La Hay. Kơ-iăng khua dêh čar lăi tơđah, anai lĕ jơlan nao pơ amăng jang jơlan guai dêh čar hăng jar kmar La Hay, rơdêh pơprong rô nao rai pơgiăng gơnam, yua anun bruă čuk pơkra jơlan rô nao rai jăng jai bĕ hĭ črăn jơlan hlăk răm kơtang khom ngă mơtam. Lơ̆m rơdêh dưi rô nao rai lĕ ăt khom pơhlôm hơđong mah jơlan jăng jai tŭ mơ̆n, anăm ngă tŭ kơ hơmâo hăt hĕ ƀu yua kơ kiăng rơdêh tañ dưi rô nao rai ôh mơ̆, čuk pơkra tŭ kơ hơmâo, ba truh tơlơi ƀu klă.

Nay Jek: Pơblang