Pơhiăp ƀơi mông jơnum, Kơ-iăng khua dêh čar ơi Nguyễn Hòa Bình lăng yom bruă bơ tŭ ư nao rai, thâo gum pơgôp hăng ngă tui djơ̆ tơlơi git gai pơčrâo bruă, ngă hrŏm pok pơhai ngă tui Hră pơtrun jơnum lok 11 khul khua apăn bruă ping gah dêh čar tal XIII, boh nik ñu bruă mă hơdai gum hrŏm ngă tui pơmut, dăp glăi sang bruă, mơnuih apăn bruă ngă khua phrâo tơdơi kơ pơmut glăi tơring čar, prăp lui klă boh yom phun jơnum ruah khua ping gah djop gưl.

Kơ bruă dăp glăi, pơmut sang bruă, Kơ-iăng khua dêh čar ơi Nguyễn Hòa Bình lăi pơtong: Anai lĕ bruă mă ječ ameč, djop tơring čar khom kiăo tui tong ten tơlơi pơtrun mơ̆ng Ping gah hăng kơnuk kơna kiăng ngă tui djơ̆, kơjăp tong ten, khom pơhaih rơđah rơđong, tơpă ară. Khom dưm tơlơi pơkă djơ̆ hơnơ̆ng kơ mơnuih ngă khua, apăn bruă jing yom hloh, pơhlom brơi ƀing ngă khua khom thâo rơgơi, thâo mă bruă, hơmâo kơnuih hiam, arăng pơpŭ sit nik plah wah amăng hơdôm tơring čar; đing nao kơ bruă pơpha bruă mă khua mua ƀơi să, khom ngă djơ̆ tơhnal pơkă amăng rơnuk phrâo.