Lơ 12/10, ƀơi Đà Lạt, Jơnum pơtrut pơsur tuh pơ alin tơring čar Lâm Đồng thun 2025 sit nik pơphun, hơmâo Kơ-iăng khua dêh čar ơi Nguyễn Hòa Bình, khua mua hơdôm ding jum anom bruă hăng giăm 750 čô khua, anom tuh pơ alin amăng čar ta hăng čar rơngiao nao pơhmư̆ tom. Kơ-iăng khua dêh čar ơi Nguyễn Hòa Bình lăng yom tơlơi gir mơ̆ng Lâm Đồng - kual lŏn tum pơƀut gêh gal hơmâo glai hăng hơmâo ia rơsĭ, lăi pơthâo 132 kơčăo bruă iâu pơthưr tuh pơ alin thun 2025 hăng 358 kơčăo bruă rơwang thun 2026-2030.

Kơnuk kơna ƀuăn gum hrŏm hăng tơring čar Lâm Đồng pơsit 4 mơta tơlơi pơsir prong: čih pơkra giong tơlơi phiăn, pơplih anih tuh pơ alin; djru man pơkra anih anom jơlan nao rai yom phun; mă yua tơlơi djru phara či pơđĭ kyar hơđong kjăp; pơtrut pơčeh phrâo, mă yua boh thâo mrô, pơđĭ kyar bơwih ƀong mơtah. Kơ-iăng khua dêh čar kiăng tơring čar pơƀut pơsir tơnap tap, biă ñu amăng bruă čuk lŏn man pơdong anih anom, ngă hruaih djŏp tơlơi hơmâo kiăng djŏp kơčăo bruă hơmâo ngă tañ hloh,/.