Ƀơi mông bưp, Kơ-iăng khua dêh čar ơi Trần Hồng Hà, hơmâo pơčrong sai hăng nai tha prin, ơi David Rogers kơ hơdôm bruă kiăng ngă lơ̆m pơblih yua mrô, tŭ yua kơ tơlơi bơwih ƀong huă mơnuih mơnam tar ƀar rŏng lŏn tơnah, mơ̆ng hơbô̆ bruă bơwih ƀong hơđăp ƀu hơđong lơ̆m kơnang nao đơi lu kông ngăn, pran jua mơnuih mă bruă samơ̆ boh tŭ yua ƀiă đôč, pơblih nao kơ bruă bơwih ƀong huă hơdjă rơgoh mơtah mơda, carbon aset, ba yua apui lơtrik gơnam yua pơkra ming glăi.

Kơnong bruă pơblih yua mrô, Kơ-iăng khua dêh čar lăi, kơnuk kơna Việt Nam amra ba jơlan hlâo jing pô blơi yua prong hloh amăng bruă mă sĭ mơdrô tui mrô. Pơblih yua mrô dưi tŭ yua lĕ, tơdah abih bang mơnuih ƀôn sang ba yua hrŏm hăng tŭ mă boh tơhnal klă hiam kơ mơnuih mơnam mơ̆ng bruă mă yua mrô, bơwih ƀong yua mrô. Hrŏm hăng anun, kiăng biă mă đing nao akŏ pơjing bruă ngă djơ̆ lăp, rơnoh yôm gru grua hiam, pran jua tơpă, pơhiăp nao rai djơ̆ rơ-ua hiam klă, pơgang rơnuk rơnua hơđong amăng plang internet, bruă pơjing rup ngă mă pơƀuh tŭ kơ hiam mơ̆ng anih ngă bruă sit nik samơ̆ lu tơlơi dŏ lŭk pŭk ba truh.