Tlam lơ 15/4, Kơ-iăng khua dêh čar ơi Trần Lưu Quang hơmâo mông bơkơtuai hăng Kơ-iăng khua dêh čar tal sa ngă rah Khua ding jum sĭ mơdrô hăng tuh pơ alin mơ̆ng čar rơngiao dêh čar Cuba Ricardo Cabrisas. Pơ ala kơ Kơnuk kơna hăng mơnuih ƀôn sang Việt Nam, Kơ-iăng khua dêh čar bơni biă mă tơlơi gum djru prong prin mơ̆ng Khua mir sir hơđăp ơi Fidel Castro, djŏp rơnuk khua mua hăng mơnuih ƀôn sang Cuba pioh kơ Việt Nam amăng bruă pơklaih rơngai lŏn ia, akŏ pơdong hăng pơgang Lŏn ia.

Kơ-iăng khua dêh čar pơsit, Kơnuk kơna Việt Nam gir pok pơhai hơdôm bruă djru Cuba pơđĭ tui bruă ngă hmua hăng pran jua gum pơgôp nao rai, adơi ayong giăng mah, tŭ yua, sit nik. Laih dong lăi nao tơlơi yôm mơ̆ng anom bơwih ƀong hăng mơnuih ƀôn sang dua bơnah amăng bruă pơphun ngă, pơtrut tui boh tŭ yua bruă ngă hrŏm dua bơnah; rơkâo Kơnuk kơna Cuba lăng ba, ngă amuñ brơi kiăng anom bơwih ƀong Việt Nam tuh pơ alin truh kih ƀơi Cuba. Dua čô Kơ-iăng khua dêh čar tŭ ư ngă hrŏm kjăp amăng bruă pok pơhai tơlơi kĭ pơkôl gưl prong hơmâo kĭ, pơtrut tui klă hloh dong tơlơi phiăn mơ̆ng Jơnum min pơlir hơbit kơnuk kơna đah mơ̆ng pơtrut tui hơdôm kơčăo bruă ngă hrŏm yôm phun, ĕp hơdră gum djru anom bơwih ƀong Việt Nam sĭ mơdrô, tuh pơ alin pơ Cuba, gum pơgôp amăng tơlơi ngă hrŏm dua bơnah.