VOV4.Jarai - Mơguah lơ 21/9, ƀơi Ƀirô Kơnuk kơna, kơ-iăng Khua dêh čar ơi Vũ Đức Đam mă bruă hăng Ding jum ia jrao, hơdôm khul grup, anom bơwih ƀong sĭ mơdrô amăng lŏn ia hăng tač rơngiao kơ bruă ngă tui hơdră pơđĭ kyar bruă pơkra pơjing jrao amăng lŏn ia. Ƀing khua mua rơkâo “Kơnuk kơna tañ mơ-it črăn pơplih amăng tơlơi phiăn gah ia jrao tui hơdră pơplih glăi amăng thun 2023 amra pơsir hĭ hơdôm tơlơi tơnap tap kơ bruă pơhrơ̆I mă yua jrao, wai lăng nua sĭ mơdrô jrao”. Tui hră lăi pơthâo mơng Anom bruă wai lăng jrao, rơnoh pơđĭ kyar mơng gơnong bruă pơkra pơjing jrao ră anai mơng 10-12%. Bruă pơkra jrao amăng lŏn ia dưm dưm 46% abih tih jrao pioh pơjrao mơnuih duam ruă.

Pơplih amăng kơsem min pơkra pơjing ia jrao

Hơdôm anom bruă aka ƀu đing nao kơsem min bruă pơkra jrao mă yua boh thâo phrâo, ia jrao phrâo, ia jrao pơjrao hơdôm tơlơi ruă kraih…Tui hăng ƀing khuamua, amăng hrơi blan laih rơgao, hơdră wai lăng nua ia jrao, tơlơi črâo ba amăng mă yua jrao ngă tơnap kơ bruă jao mă yua boh thâo phrâo amăng pơkra jrao phrâo. Bruă tuh pơ alin amăng kơsem min hăng pơđĭ kyar dŏ aset. Hơdôm tơlơi pơgôp hiăp, rơkâo đĭ amăng bruă pơkra pơjing jrao kiăng đing nao pơhưč tuh pơ alin amăng bruă pơkra pơjing hăng hơmâo jrao klă dong; man pơdong anih anom kơsem min vaccine, pơđĭ kyar ia jrao amăng lŏn ia; klă dong amăng kơsem min, pel ĕp sem lăng ia jrao.

Siu Đoan: Pơblang