VOV4.Jarai-Mơguah lơ 30/9, ƀơi Hà Nội, Khul đah kơmơi mut phung Việt Nam pơphun jơnum pơƀut mơkrah bruă mă 2 kơčăo bruă mơ̆ng kơnuk kơna mơ̆ng thun 2017-2022 hơmâo: Kơčăo bruă “Pơtô pơblang, pơtô hrăm, jak iâu, djru ba đah kơmơi ngă hrom pơsir lu mơta tơlơi bruă mơnuih mơnam pơdjơ̆ nao mơ̆ng thun 2017-2027 juăt lăi Kơčăo bruă 938 hăng kơčăo bruă djru đah kơmơi pơphun bruă mă mơ̆ng thun 2017-2025 anăn kơčăo bruă 939.

Kơ-iăng khua dêh čar ơi Vũ Đức Đam hăng khua mua djop ding jum, anom bruă mơ̆ng gơnong dlông nao jơnum hrom. Ƀơi mông jơnum, khua mua pơ ala mơnuih djop tơring čar, ƀôn prong hơmâo kah pơpha tơlơi thâo thăi tom găn rơgao, hơdră ngă tui ba glăi boh tŭ yua amăng dua kơčăo bruă anai pioh pok pơhư prong tui kah hăng hơbô̆ bruă ngă hmua pla tiu rơgoh hơdjă, hơbô̆ bruă pơgăn tơlơi taih amang amăng sang anŏ; hơbô̆ bruă pơphun bruă mă tŭ yua mơ̆ng ƀing đah kơmơi. Laih dơ̆ng rơkâo ngă tui lu hơdră pok pơhai 2 kơčăo bruă anai klă hloh pơ anăp adih.

Kơ-iăng Khua dêh čar ơi Vũ Đức Đam lăi lĕ, lơ̆m ba yua boh thâo ia rơgơi  pioh pơtô ba tơlơi thâo kơ ƀing đah kơmơi, djop gưl khul đah kơmơi mut phung đing nao kơ ƀing đah kơmơi tơnap tap, kual ataih, kual asuek kiăng gơñu dưi hmư̆ tŭ mă boh yôm phun pơtô pơblang.

Nay Jek: Pơblang