Amăng mông jơnum Khua hơdôm Ding jum, Gơnong bruă dêh čar ta hmâo bơkơtuai rơđah hăng hơdôm khul grŭp, anom bơwih ƀong kơ 2 Tơlơi pơtrun anai; lăi anai lĕ tơhnal gal pioh Sang prăk Kơnuk kơna ăt kah hăng hơdôm ding jum gơnong bruă hmư̆ tơlơi gum pơhiăp mơng anih anom sĭ mơdrô, mơng anom bơwih ƀong, pơsit tŏng ten hơdôm anô̆ bơdjơ̆ nao kiăng “ĕp tơbiă hơdôm anô̆ dưm kơnar” hăng hmâo hơdôm bruă mă djơ̆ djru rah anom bơwih ƀong laih anun pơhlôm rah bruă brơi čan prăk.

Klah čun bruă jơnum, Kơ-iăng Khua dêh čar ta, ơi Lê Minh Khái pơsit yôm pô pơ ala kơ hơdôm ding jum, gơnong bruă, anom bơwih ƀong, khul grŭp hmâo tơlơi kiăng hrưn đĭ, lăi pơthâo nao rai tơpă pioh ngă rơđah phun than tơlơi kiăng pơsir. Lăi rơđah, Sang prăk Kơnuk kơna hmâo 2 bruă mă yôm phăn, sa lĕ git gai hơdră bruă prăk kak, pơhlôm wai lăng tơlơi đĭ nua gơnam tam, hơđong bơwih ƀong prong, pơtrut pơđĭ kyar bơwih ƀong. Dua lĕ, pơhlôm abih bang glông bruă sang prăk. Anai lĕ bruă mă tơnap, khom hmâo tơlơi pơkĕ hrŏm hăng hơdôm jơlan pơsir lăp djơ̆, ba glăi bôh tơhnal./.