Tui hăng tơlơi lăi pơthâo glăi mơ̆ng Ding jum man pơphô hăng tuh pơ alin, bruă dưm dăp pơkă hơnong kiăng truh thun 2030, kual Lŏn dăo ia krông Hồng đĭ kyar tañ, hơđong kơjăp, hơmâo tơlơi bơwih ƀong lăp djơ̆, djă gru grua djuai ania; pơƀut đĭ kyar măi mok, bơwih brơi phrâo hăng ngă hmua mă yua boh thâo phrâo, hơdjă, mơtah mơda, hơmâo nua pơmă; jing kual pơtô hrăm, pơtô pơjuăt mơnuih mă bruă rơgơi, hơmâo lu mơnuih mă bruă; nao hlâo kơsem min boh thâo ia rơgơi phrâo, pơčeh phrâo, pơplih phrâo mrô, bơwih ƀong mrô, mơnuih mơnam mă yua mrô; hơmâo tơlơi bơwih ƀong - mơnuih mơnam dưm kơnar, phrâo, plơi prong rơgơi, pơtruh nao rai kơtang.

Tum pơƀut glăi ƀơi mông jơnum, Kơ-iăng khua dêh čar Trần Hồng Hà kiăng: Bruă pơkă hơnong pơđĭ kyar kiăng ngă rơđah hloh tơlơi phara mơ̆ng kual, tơlơi gêh gal mơ̆ng rim kual, mơ̆ng anun kah mơ̆ng dưi čih pơkra bruă dưm dăp pơđĭ kyar djơ̆ hăng kual, hơmâo anŏ phara, pơtrut tui tơlơi đĭ kyar mơ̆ng Kual pơlir hăng tơlơi hmư̆ hing bơwih ƀong, kơđi čar amăng dêh čar ta.