Tui akŏ bruă truh thun 2050, Gia Lai amra jing kơdư hiam hơdjă, bơrơguăt drơi jăn hăng suaih pral, anih čuă ngui hiam hơdjă, phara hăng yôm hloh, jing kual lŏn mơtah, ba blai gru grua tui jơlan gah ba gru amăng tơlơi bơwih ƀong huă pơđĭ kyar hơđong kjăp. Tui akŏ bruă anai truh thun 2030, tơring čar Gia Lai amra pơđĭ kyar tañ, tŭ yua hăng hơđong kjăp. Hrưn đĭ klă, pơđĭ kyar kơtang, anăp nao pơđĭ kyar mơtah, jing anih phun amăng kual kơdư Dap kơdư hăng kual pơtrut pơđĭ kyar kơplah wah Việt Nam-Lao-Kur.

Đĭ pơhiăp git gai mông jơnum, Kơ-iăng khua dêh čar Trần Hồng Hà lăng, Gia Lai kual lŏn gêh gal kơ ayuh hyiăng, hơmâo tơlơi dưi, hơmâo gru grua yôm phara. Akŏ bruă dưm dăp man pơdong tơring čar Gia Lai lĕ sa tơlơi yak nao ngă tui tơlơi črâo trun mơng Ding jum kơđi čar anăp nao hơnong pơkă pơđĭ kyar tơring čar Gia Lai jing anih ba gru amăng pơđĭ kyar mơtah, hơđong kjăp, hơmâo gru grua yôm phara.