Pơhiăp git gai jơnum pơphun sa Thun pơhlôm rơnuk rơnua jơlan glông nao rai thun 2024, Kơ-iăng khua dêh čar, Trần Lưu Quang lăi rơđah, thun 2024, hơdôm bruă mă pơgang rơnuk rơnua kơ mơnuih ƀôn sang rô nao rai ăt sa tơlơi gir run kơtang hloh mơ̆ng djop anom bruă kơđi čar. Kơ-iăng khua dêh čar lăi, Akŏ bruă pơhlôm rơnuk rơnua jơlan glông thun 2024 mơ̆ng Jơnum min pơgang rơnuk rơnua jơlan glông dêh čar hăng akŏ ñu lĕ “Pơpŭ kơ tơlơi phiăn pơjing sa gru grua hiam ƀơi jơlan glông”.

Tui hăng tơlơi kiăng anun, Kơ-iăng khua dêh čar rơkâo djop ding jum, anom bruă, tơring čar, ƀôn prong hăng djop sang bruă kơnuk kơna, khul grup kơđi čar mơnuih mơnam akŏ pơjing bruă mă hăng pok pơhai ngă tui lăp djơ̆ tui hăng bruă mă, tơlơi dưi, anŏ glăm ba mơ̆ng pô ta laih anun anŏ gêh găl tơlơi pơhing mơ̆ng djop sang bruă, anih dŏ mă bruă. Biă mă ñu, pok pơhai ngă tui khut khăt, tŭ yua amăng bruă pơhlôm pơgang tơlơi rơnuk rơnua hơđong ƀơi jơlan glông hơdôm hrơi mơak čơkă thun phrâo Giáp Thìn 2024 pơ anăp anai.