Hơjan ia ling dăo, lŏn tơhroh ngă laih 3 čô mơnuih djai hăng rơngiă ƀơi să Mường Lang, amăng anun hmâo sa čô čơđai 5 thun. Hrŏm hăng anun, hơjan prong hmâo ngă răm rai rơbêh kơ 40 ektar hmua pơdai mơ̆ng mơnuih ƀôn sang; 6 bôh sang lŏn tơhroh, amăng anun, 3 bôh sang khom rit đuăi tañ, 3 bôh sang glăk pơkra glăi.

Ră anai, tơring glông Phù Yên glăk črâo ba dong khul mơnuih mă bruă pok pơhai hyu hơduah ĕp mơnuih rơngiă dô̆ glăi, iâo pơhrui mơnuih ƀôn sang, mơnuih apăn bruă, mơnuih mă bruă Jơnum min mơnuih ƀôn sang tơring glông hrŏm hăng să pơphun yuă pơhrui pơdai răm rai yua kơ ia ling dăo ngă. Kơ-iăng Khua Ding jum đang hmua hăng pơđĭ kyar ƀôn lan dêh čar ta, ơi Nguyễn Hoàng Hiệp čih djă pioh hơdôm tơlơi gir run mơ̆ng tơring glông Phù Yên amăng bruă rŭ pơdŏng glăi, hyu ĕp mơnuih rơngiă hmâo tơlơi truh. Hrŏm hăng anun, rơkâo tơring čar Sơn La hăng tơring glông Phù Yên pel ĕp glăi pơsir anô̆ răm rai yua hơjan ia ling dăo ba truh, tañ hơđong tơlơi hơdip mơda hăng bơwih ƀong huă ngă đang hmua kơ mơnuih ƀôn sang./.