Amăng mông bưp, kơ-iăng Khua ding jum Đặng Hoàng Giang pơsit tong Việt Nam, hăng tơlơi gơgrong lĕ dêh čar djru bruă kơplah wah ASEAN-Angle rơwang thun 2024-2027, amra tŏ tui gum hrŏm kjăp hăng dêh čar Angle kiăng ba tơlơi rô nao rai kual ASEAN-Angle pơđĭ kyar kơtang, djop mơta, sui pơ anăp, lăp djơ̆ hăng tơlơi rơkâo ngă hrŏm mơng dua bơnah hăng djơ̆ tơlơi kiăng amăng rơnuk phrâo. Việt Nam ăt glăk gir run gum hrŏm, pơtrut pơjing akŏ bruă gum hrŏm ASEAN-Angle rơwang thun 2027-2031, đing nao hơdôm bruă ngă hrŏm phun anun lĕ bơwih ƀong huă, prăk kak, pơplih mơtah, pơđĭ kyar hơđong kjăp, bong glăi ayuh hyiăng pơplih sat, pơplih pơčeh phrâo, ngă hrŏm kual ia rơsĭ…

Kơ tơlơi rô nao rai dua bơnah, kơ-iăng Khua ding jum Đặng Hoàng Giang lăng yôm tơlơi gum hrŏm mơng Angle brơi kơ Việt Nam amăng bruă pơdong Anom bruă prăk kak jar kmar, pơtrut ngă hrŏm amăng djop mơta bruă; rơkâo Angle pơlăi nao rai tơlơi găn rơgao amăng pơplih yua apui lơtrik hơdjă.