Lơ 2/5, Khua čih pioh Ƀirô Khua pơ ala mơnuih ƀôn sang dêh čar hơmâo hră lăi pơthâo kơ tơlơi pơgôp hiăp mơng Jơnum min apăn bruă Khua pơ ala mơnuih ƀôn sang dêh čar kơ bruă jao git gai bruă mă mơng Jơnum min apăn bruă hăng Ƀirô Khua pơ ala mơnuih ƀôn sang dêh čar. Tui anun, Jơnum min apăn bruă khua pơ ala mơnuih ƀôn sang Việt Nam ruah ơi Trần Thanh Mẫn, Ding kơna Ding jum kơđi čar, Kơ-iăng Khua git gai pơ ala mơnuih ƀôn sang git gai bruă mă mơng Jơnum min apăn bruă hăng Ƀirô Khua pơ ala mơnuih ƀôn sang dêh čar. Hlâo anun, tơdơi kơ hmư̆ hơdôm pok hră lăi pơthâo, tơlơi rơkâo mơng ơi Vương Đình Huệ, Ƀirô Khua pơ ala mơnuih ƀôn sang dêh čar hơmâo pơčrông sai, plĕ hră hơgŏm hăng tŭ yap tơlơi pơtrun brơi pơdơi bruă hăng Khua git gai pơ ala mơnuih ƀôn sang, Ding kơna Khul pơgang rơnuk rơnua, brơi pơdơi bruă hăng ơi Vương Đình Huệ.

Ơi Trần Thanh Mẫn thun tơkeng 1962, ƀơi tơring glông Châu Thành, tơring čar Hậu Giang, hơmâo găn rơgao lu anih mă bruă anun lĕ: ngă kơ-iăng khua hăng khua Jơnum min mơnuih ƀôn sang tơring čar, khua git gai Ping gah ƀôn prong Cần Thơ, Kơ-iăng khua laih anun đĭ ngă khua Jơnum min djop djuai ania mơnuih mơnam Việt Nam. Blan 4/2021, ơi Trần Thanh Mẫn hơmâo Khua pơ ala mơnuih ƀôn sang dêh čar tal XIV ruah ngă kơ-iăng Khua git gai pơ ala mơnuih ƀôn sang dêh čar.