Kơ-iăng khua git gai pơ ala mơnuih ƀôn sang Nguyễn Đức Hải pơpŭ kơ abih bang, kiăng Khua mua wai lăng tơlơi đăo, Khul đăo phơ̆t Việt Nam hiam drơi jăn pran jua na nao. Bơni hơ-ơč kơ khul đăo čơkă thun phrâo 2024 mơ-ak mơ-ai, hiam drơi jăn, iâu lăi brơi lŏn ia pơdrong sah, ană plơi rơnuk rơnua, djŏp sang anŏ lêng kơ trơi pơđao yâo mơ-ak.

Hoà thượng Thích Thanh Nhiễu, Kơ-iăng khul apăn bruă wai lăng Khul đăo phơ̆t Việt Nam pơpŭ bơni, lăp hơdor tơlơi khăp ƀu-eng, lăng ba mơ̆ng khua mua pơ ala mơnuih ƀôn sang Việt Nam. Laih dong brơi thâo, Khul đăo phơ̆t Việt Nam amra pơtrut tui hơdôm boh than hơmâo ngă amăng khul đăo phơ̆t thun 2024, gum hrŏm hăng djuai ania ta, pơtrut tui hơdôm boh than hơmâo ngă, pơtô pơblang, iu pơthưr mơnuih tui đăo phơ̆t ngă tui klă djŏp tơlơi pơtrun mơ̆ng Ping gah, tơlơi phiăn mơ̆ng Kơnuk kơna, kjăp pran jua gum pơgôp djuai ania akŏ pơdong plơi pla jai hrơi klă hiam, rơnuk rơnua, yâo mơ-ak.