Čơtlăm tom brơi (21/8), ƀơi Sang mă bruă Khua pơ ala mơnuih ƀôn sang dêh čar ta, Ding kơna Ding jum kơđi čar, Kơ-iăng Khua git gai wai lăng pơ ala mơnuih ƀôn sang dêh čar, ơi Trần Thanh Mẫn – Khua Grŭp pơphun Jơnum hlăk ai ngă Khua pơ ala mơnuih ƀôn sang đơ đam rŏng lŏn tơnah tal 9, hmâo git gai mông jơnum hăng Grŭp pơphun bruă, hơdôm Jơnum min gah Grŭp pơphun bruă hăng Grŭp čih pioh dêh čar kiăng pel ĕp glăi bruă prăp lui pơphun Jơnum.

Kơ-iăng Khua git gai wai lăng pơ ala mơnuih ƀôn sang dêh čar, ơi Trần Thanh Mẫn lăi rơđah, Jơnum hlăk ai Khua pơ ala mơnuih ƀôn sang đơ đam rŏng lŏn tơnah tal 9 mơ̆ng Khul pơlir hơbit Khua pơ ala mơnuih ƀon sang Rŏng lŏn tơnah (IPU) yua kơ Khua pơ ala mơnuih ƀôn sang dêh čar Việt Nam pơphun jing bruă jơnum bơkơtuai hmâo tơhnal yôm phăn mơ̆ng Ping gah, Kơnuk kơna ta amăng thun anai. Anai lĕ bruă kơđi čar prong biă, hơdôm gơnong bruă, hơdôm gưl, anom bruă khom ngă klă bruă prăp lui, djru bruă Jơnum, pioh glăi bôh tơhnal tâ̆o hiam hăng ƀing khua pơ ala nao pơhmư̆ mông Jơnum gah gru rŭp lŏn ia, ană mơnuih Việt Nam; bruă čơkă jum – pŭ asơi khom pơhlôm klă. Kơnong dô̆ rơbêh kơ 20 hrơi dong amra pơphun Jơnum, hơdôm hrơi prăp lui ƀu dô̆ lu, lăi rơđah tơlơi anai, Kơ-iăng Khua git gai wai lăng pơ ala mơnuih ƀôn sang dêh čar, ơi Trần Thanh Mẫn pơtă hơdôm ƀirô, anom bruă hăng rim anih mă bruă bơdjơ̆ nao ngă tui pran jua gơgrong prong, pok pơhai klă bruă hmâo jao./.