Amăng rơwang rai čuă hăng mă bruă ƀơi dêh čar Việt Nam mơ̆ng Grŭp Khua pơ ala Khua pơ ala mơnuih ƀôn sang dêh čar Lao, čơtlăm tom brơi (4/9), ƀơi ƀôn prong Đà Nẵng, Kơ-iăng Khua git gai wai lăng pơ ala mơnuih ƀôn sang dêh čar ta ơi Nguyễn Đức Hải git gai mông bơkơtuai hăng Kơ-iăng Khua git gai wai lăng pơ ala mơnuih ƀôn sang dêh čar Lao Sổm-mạt Phôn-xển-na.

Amăng mông bơkơtuai, Kơ-iăng Khua git gai wai lăng pơ ala mơnuih ƀôn sang dêh čar Lao pơtŏng sit, bruă Khua pơ ala mơnuih ƀôn sang dêh čar Lao pơkiăo Grŭp hyu mă bruă rai čuă hăng mă bruă ƀơi dêh čar Việt Nam jing bruă pok pơhai Tơlơi pơkôl gum hrŏm kơplah wah Khua pơ ala mơnuih ƀôn sang dua bôh dêh čar. Kơ-iăng Khua git gai wai lăng pơ ala mơnuih ƀôn sang dêh čar ta ơi Nguyễn Đức Hải pơtŏng sit, thun 2024, Khua pơ ala mơnuih ƀôn sang dêh čar Lao gơgrong bruă Khua AIPA, pơphun Jơnum Khul AIPA-45, Việt Nam amra djru Lao gơgrong klă hloh bruă Khua ASEAN/AIPA, mơ̆ng anun djru pơđĭ tui bruă mă, pran gơgrong mơ̆ng Lao ƀơi kual hăng ƀơi rŏng lŏn tơnah./.