Tui hăng kơ-iăng khua mir sir, tơring čar Quảng Nam jing kual lŏn glăm ba lu tơlơi djai rơngiă hloh amăng rơnuk blah wang. Pơ anai hơmâo rơbêh 65 rơbâo čô tơhan djai pơsăn drơi kơ lŏn ia, 15.339 čô amĭ Việt Nam sông kơtang hăng 45.500 čô mơnuih hơmâo anăn kơnuk kơna djru na nao. Kơ-iăng khua mir sir Võ Thị Ánh Xuân kiăng tơring čar Quảng Nam pơƀut pơsir hơdôm tơlơi tơnap tap hơmâo hơdôm Grup hyu hơduah ĕp, sem lăng mơ̆ng Ping gah dêh čar črâo brơi, ƀrô gir ngă bruă rah, ngă truh kih djŏp hơnong pơkă bruă hơmâo jao amăng thun 2021-2025, mơ̆ng anun hơmâo tơlơi pơplih prong hloh pơ anăp anai.

Amăng mông anai, Kơ-iăng khua mir sir Võ Thị Ánh Xuân brơi kơƀang pơ ala brơi bruă djru, djru kơ tơring čar Quảng Nam 10 boh sang dŏ hơdor tơngia, nua ñu 500 klăk prăk; brơi 200 anung gơnam Tê̆t kơ sang anŏ hơmâo anăn kơnuk kơna djru hăng sang anŏ rin ƀơi Quảng Nam; brơi 200 anung gơnam Tê̆t djru ba kông ñơn rin rơpa, hăng 200 klăk prăk djru ba čơđai sang anŏ tơnap ƀơi tơring čar Quảng Nam.