Kơ-iăng khua mir sir Võ Thị Ánh Xuân hok mơ-ak lơ̆m ƀuh tơlơi hơdip mơ̆ng ană plơi đĭ kyar rơđah, prăk pơhrui yap tui akŏ mơnuih hơmâo rơbêh 60 klăk prăk/sa čô/sa thun; amăng plơi dŏ glăi 2,49% boh sang anŏ rin hăng 6,53% boh sang anŏ giăm rin; tơlơi rơnuk rơnua kơđi čar hơmâo wai lăng hơđong. Kơ-iăng khua mir sir kiăng djŏp gưl ping gah, gong gai, khul grup kơđi čar mơnuih mơnam tơring čar Bạc Liêu pơtrut pơtô pơblang, pơđĭ tui tơlơi thâo hluh kơ tơlơi gơgrong bruă mơ̆ng Jơnum min djŏp djuai ania mơnuih mơnam Việt Nam amăng bruă akŏ pơdong hăng pơgang lŏn ia.

Hluai tui bruă mă sit nik či pơtô pran khăp kơ lŏn ia, gru grua tơhan sông kơtang, tơlơi pơmin ngă mă pô, tơlơi phiăn hiam klă mơ̆ng djuai ania; biă ñu khŏm thâo pơmin dlăm kơ gru grua kual lŏn hăng ană mơnuih Bạc Liêu, đăo kơnang kơjăp kơ tơlơi pơđĭ kyar mơ̆ng lŏn ia, mơ̆ng tơring čar amăng hơdôm thun pơ anăp.