Amăng mông bưp, Kơ-iăng khua mir sir hok mơ-ak lơm ƀuh tơlơi rô nao rai ngă hrŏm kơplah wah dua bơnah amăng thun blan giăm anai glăk pơđĭ kyar kơtang, sit biă ñu amăng mông pơbưp nao rai kơplah wah khul grup, djop gưl. Bruă hơkrŭ glăi pran đăo gơnang kơđi čar, sit biă ñu lĕ khua mua pơprong dua bơnah lĕ ƀing mơnuih gơgrong ngă pơttrut ngă hrŏm dua bơnah. Samơ̆ hơdôm boh than ba glăi amăng ngă hrŏm dua bơnah aka ƀu djơ̆ hăng tơlơi rô nao rai hiam klă, tơlơi gal mơng dua bơnah.

Hluai tui tơlơi anun, Kơ-iăng khua mir sir rơkâo dua bơnah tŏ tui kơtưn pơbưp nao rai khul grup, djop gưl, sit biă ñu khua mua pơprong. Laih dong kơtưn pơphun hơdôm bruă pơsur sĭ mơdrô, tuh pơ alin, jơnum bơkơtuai anom bơwih ƀong sĭ mơdrô, kơtưn blơi mut hơdôm gơnam yôm mơng dua bơnah. Khua anih jưh Qatar pơsit tong, Việt Nam lĕ dêh čar yôm phăn hăng Qatar amăng kual Asia-Thái Bình Dương hăng ƀuăn amra gir run abih pran, pơgôp hơkrŭ hăng kơtưn ƀiă dong tơlơi rô nao rai giang mah hăng ngă hrŏm dua bơnah.