Tơdơi kơ ba mơkrah blan mơ̆ng Tuy Hòa nao pơ̆ Buôn Ma Thuột čơkă bruă mă ƀơi Khul hlăk ai tơring čar Dak Lak, amai Nguyễn Thị Như hmâo tañ hơđong laih anih dô̆, ruah mă sang hră kơ ană hăng bơwih brơi djop gơnam mă yua kiăng hloh. Khă gun lu bruă ƀơi anih anom phrâo, samơ̆ dưi hmâo gơyut gơyâo, ƀing gŏp djru ba anun amai Như ƀu bưp lu tơlơi tơnap mơn.

“Ƀơi anăp amra hmâo lu bruă pioh mă, mrô bruă lu hloh, đĭ dong mrô bruă. Bruă mă gah rơngiao kơ mông pơkă, mă amăng rơnuč rơwang hrơi tơjuh lĕ lăi hrŏm pơ̆ anăp anai amra lu bruă glêh glar hloh. Ƀơi anih mă bruă hơđăp lĕ hmâo ơi yă djru ba, ră anai nao pơ̆ anih mă bruă dua rơkơi bơnai khom gir run dưm dăp pioh hơđong pran jua, mă bruă”.

Ăt amăng bruă nao mă bruă pơ̆ anih mă bruă phrâo mơn, amai Nguyễn Thị Thanh Huyền, mă bruă ƀơi Grŭp pơtô bruă Ping gah hăng Pơtô ba mơnuih ƀôn sang Ping gah tơring čar Dak Lak, lăi pơthâo, ñu hăng 25 čô mơnuih apăn bruă, mơnuih mă bruă phrâo nao mă bruă hmâo čơkă mă laih tơlơi gum djru hur har mơ̆ng ƀing gŏp.

“Mơ̆ng khua git gai grŭp, khua git gai anom bruă hăng ƀing adơi amai leng kơ djru hơduah ĕp brơi kơ sang dô̆, ep sang hră kơ ană, mơ̆ng hơdôm bruă anet kah hăng črâo brơi rim anih sang čơ ƀudah anih ƀong huă, nao mă bruă leng hmâo tơlơi gum djru abih bang pran jua. Kâo ƀuh tơlơi gum hrŏm hơbit, kĕ phĭ hăng bôh nik kah hăng mơnuih amăng sang bôh sang anô̆, pioh mơnuih apăn bruă, mơnuih mă bruă Phú Yên hơđăp nao mă bruă ƀơi Dak Lak phrâo hơđong pran jua mă bruă hăng tuh rơyuh pran jua kơ tơring čar Dak Lak phrâo sit nik pơđĭ kyar”.

Tơdơi kơ pơmut hrŏm, giăm hmâo 700 čô mơnuih apăn bruă, mơnuih mă bruă mơ̆ng tơring čar Phú Yên nao mă bruă ƀơi anom bruă čar tơring čar Dak Lak phrâo. Khă pơplih anih anom dô̆ hơdip mơda, tơlơi mă bruă ƀudah anih anom dô̆ hơdip mơda, gơñu leng kơ pơsit pran jua, gơgrong hlâo ngă juăt, amra pơmut hrŏm hăng tuh rơyuh.

Amai H’ Như mă bruă ƀơi Sang adôh tơlơi adôh suang đưm Sao Biển lăi lĕ, hmâo tơlơi khăp bruă mă hăng pran jua ƀing gŏp lĕ, mă bruă pơ̆ hơpă leng kơ gêh gal.

“Hăng kâo pơ̆ hơpă leng kơ dưi dô̆ hơdip, biă ñu ƀing ta hơdip hiưm hơpă, kiăng khăp hiưm ñu hăng djru nao rai tơdruă amăng tơlơi hơdip mơda”.

Bơ̆ amai Đỗ Anh Thư, mơnuih mă bruă ƀơi Sang djă pioh gru grua Phú Yên mơ-ak brơi thâo:

“Ră anai pơmut hrŏm hăng Dak Lak sit ñu pô amra tŭ mă hăng pơhrua nao bôh thâo, pơplih anun jing sa gru grua, pô jing mơnuih ƀôn sang ƀơi anih anom phrâo tơring čar Dak Lak. Hơduah ĕp lăng bôh thâo ƀơi anai pioh djru mơnuih ƀôn sang, hơdôm gru bôh thâo đưm ƀu dô̆ kah pha kual tơpual dong tah”.

Bruă ngă juăt hăng tơlơi ƀơi anih mă bruă phrâo jing kiăng djru tơlơi gum djru mơ̆ng rim mơnuih apăn bruă, mơnuih mă bruă. Hơdôm tơlơi lăi pơthâo, gum djru hmao tlôn kơplah wah ƀing gŏp hăng anom bruă hmâo ngă laih tơlơi jê̆ giăm hloh ƀơi rơgôp bơbung sang hrŏm – Dak Lak. Khă mơ̆ng hơpă nao, khă rim plơi pla hơpă, abih bang leng kơ glăk gum hrŏm anăp nao sa tơhnal pơkă hrŏm: pơđĭ kyar plơi pla hơđong, kơjăp./.