Yua bơbeč mơ̆ng ayuh hyiăng rơ-ŏt ƀơi ia rơsĭ Ngŏ, mơng mơguah tom brơi (25/9) ƀơi tơring čar Kon Tum hmâo hơjăn. Bŏng glăi hăng ayuh hyiăng rơ-ŏt pơkă lăng hlâo amra bơdjơ̆ nao ba truh hơjan prong amăng hơdôm hrơi pơ̆ anăp, gong gai hơdôm gưl mơ̆ng tơring čar Kon Tum gơgrong hlâo pok pơhai hơdôm bruă pơgang, pơgăn hơjan ia ling dăo hăng lŏn tơhroh.

Ƀơi hơdôm bôh tơring glông amra bơbeč djơ̆ ƀơi anăp hyuh hyiăng rơ-ŏt ngă, amăng anun hmâo: Kon Plông, Tŭ Mrông hăng Đăk Glei, Jơnum min mơnuih ƀôn sang tơring čar Kon Tum črâo ba gong gai hơdôm tơring glông, plơi prong tañ pok pơhai bruă pơgang, pơhlôm hlâo hơjan ia ling dăo hăng lŏn tơhroh. Hăng hơdôm kual plơi mơnuih ƀôn sang kơtuai hang ia krông čroh hnoh, kual klung hŭp, amra hmâo ia ling dăo, ia ling kor, lŏn tơhroh prong prăp lui hlâo jơlan gah bŏng glăi, gơgrong hlâo pơphun bruă ba đuăi mơnuih ƀôn sang lơm hmâo tơlơi truh. Prăp lui khul mơnuih wai lăng, pơtô brơi jơlan nao rai ƀơi hơdôm anih kueng ia blai, kual ia ling dăo dơlăm, ia rô juar. Pơpha khul mơnuih, gơnam tam pioh pơsir tơlơi truh, pơhlôm jơlan nao rai hluh gah ƀơi hơdôm ară jơlan phun lơm hmâo hơjan prong./.