Tơdơi lu wot pơphun, Jơlan hơdră kơphê Anom bơwih ƀong – Mơnuih bơwih ƀong pơphun rim blan mơng Jơnum min mơnuih ƀôn sang tơring čar Kon Tum jing laih anih hơdôm anom bơwih ƀong lăi pơhing kơ hơdôm tơlơi juăt bưp amăng bơwih ƀong, tuh pơplai, sĭ mơdrô hrŏm hăng hơdôm tơlơi gun hră pơ-ar kiăng pơtlaih. Kah hăng tơlơi sa bôh anom bơwih ƀong mă lŏn čuah, khă dưi ruah tuh pơplai samơ̆ ƀu mă bruă ôh yua kơ ƀu dưi tô jơlan mut jơlan mrô 24 pioh pơgiăng gơnam. Ơi Huỳnh Thanh Tú, khua pơ ala kơ anom bơwih ƀong gum pơhiăp:

 “Rơwang bruă mơng Sang bruă Hoàng Khánh Trâm ƀơi tơring glông Kon Plông. Anai lĕ rơwang bruă mă lŏn čuah jing kông ngăn mơng Kơnuk kơna. Jơnum min mơnuih ƀôn sang tơring čar hmâo pơkă kual mă lŏn čuah hăng ba tơbiă juă nua. Anom bơwih ƀong dưi ruah thun 2019. Pơsit hơdră pơtrun tuh pơplai tum djop abih laih ră anai nao rơkâo mă lŏn čuah lĕ Gơnong bruă jơlan nao rai dŭ pơgiăng lăi, črăn jơlan anai ƀu dưi tô nao ôh anun ƀu dưi. Tui anun, kông ngăn anai lĕ kông ngăn Kơnuk kơna, sĭ kơ arăng laih samơ̆ ih ƀu brơi arăng pơgiăng đuăi hiưm”.

Jơlan hơdră Kơphê Anom bơwih ƀong – Mơnuih bơwih ƀong mơ̆ng tơring čar Kon Tum lĕ anih khua git gai tơring čar čơkă hmư̆ hăng lăng ƀuh bôh nik mă bruă mơ̆ng hơdôm anom bruă čar. Kah hăng tơlơi mơ̆ng Sang bruă Hoàng Khánh Trâm, ơi Lê Ngọc Tuấn, Khua Jơnum min mơnuih ƀôn sang tơring čar Kon Tum, ƀu kơnong kơ lăng ƀuh tơlơi tơnap mơng anom bơwih ƀong ôh mơ̆ dô̆ lăng ƀuh tơlơi ƀu gal amăng rơwang bruă juă nua anih mă lŏn čuah ƀơi tơring čar hăng črâo ba pơsir đut tơhnal:

 “Tơlơi anai anăm pioh pô tuh pơplai răm rai ôh. Jao kơ Gơnong bruă jơlan nao rai dŭ pơgiăng pơtô brơi pô tuh pơplai ngă pơ-ar hiưm hơpă rơguăt hloh laih anun lăi pơthâo glăi kơ Jơnum min. Mơ̆ng ră anai pơ̆ anăp abih bang hơdôm hơdră mă yua lŏn čuah kah hăng tơđar khom pơhlôm abih bang tơlơi pơkă laih anun kah mơ̆ng dưi ba tơbiă nua juă. Dưi ruah amăng juă nua thơ ngă tui đôč ƀu hmâo tơlơi gun hơget dong tah. Hlâo adih ƀing gih ngă akă giong, juă nua giong lơm pok pơhai lĕ bơdjơ̆ nao lŏn pơgang lŏn ia, rơnuk rơnua plơi pla, laih anun bơdjơ̆ nao lŏn glai, djơ̆ nao juă nua. Tơlơi anai ƀu gal mă mơ̆ng ră anai pơ̆ anap ƀu hmâo tơlơi anai dong tah”.

Tui hăng ơi Trương Lê Mãnh, Khua Khul mơnuih hlăk ai bơwih ƀong tơring čar Kon Tum, hơdôm anom bơwih ƀong ƀơi tơring čar ră anai hmâo laih lu tơlơi gal pioh pơbưp khua git gai tơring čar hơduah ĕp tơhnal tuh pơplai ƀudah ba tơbiă tơlơi čang rơmang, lăi pơthâo hơdôm tơlơi gun, tơlơi tơnap. Hơdôm bruă pơbưp tui anun ăt hmâo na nao mơn rim blan rơgao Jơlan hơdră Kơphê Anom bơwih ƀong – Mơnuih bơwih ƀong ƀudah tui jơlan hơdră bơkơtuai nao rai hăng anom bơwih ƀong dưi hmâo tơring čar pơphun brơi 6 blan sa wot. Ơi Trương Lê Mãnh lăi lĕ, anai lĕ hơdôm glông bơkơtuai ba glăi bôh tơhnal sit nik:

 “Amăng hơdôm jơlan hơdră bơkơtuai ăt kah hăng Kơphê Mơnuih bơwih ƀong – Anom bơwih ƀong yua kơ Jơnum min mơnuih ƀôn sang tơring čar pơphun lĕ sa glông jơlan pơhing ba glăi bôh tơhnal pioh gong gai hmao tlôn, thâo hăng pơtlaih hơdôm tơnap, tơlơi gun lăp djơ̆ hloh kơ anom bơwih ƀong, mơnuih tuh pơplai. Ƀing Khua tơring čar kiăng thâo hrưn đĭ, ƀu djơ̆ luă gŭ kơ hlơi mơ̆ bĕ hĭ, ƀu dưi bĕ ôh hăng hơdôm tơlơi tơnap anom bơwih ƀong bưp djơ̆, črâo ba pơtlaih hơdôm anô̆ ngă gun bruă ngă rai, sĭ mơdrô gơnam mơ̆ng anom bơwih ƀong amăng tơlơi dưi mơng Jơnum min mơnuih ƀôn sang tơring čar”.

Dong mơ̆ng thun 2022 truh ră anai hluai tui hơdôm bruă bơkơtuai hăng Jơlan hơdră Kơphê Anom bơwih ƀong – Mơnuih bơwih ƀong, Khua tơring čar Kon Tum hmâo čih djă pioh 136 mơta tơlơi mơ̆ khua pơ ala Anom bơwih ƀong rơkâo đĭ hăng tơring čar.

Hăng hơdôm tơlơi gun ƀu tơnap dưi hmâo Khua tơring čar Kon Tum pơtlaih ƀơi anun mơtăm. Hơdôm tơlơi tơnap bơdjơ̆ nao lu gưl, lu gơnong bruă khua tơring čar pơsit rơđah bruă jao, bruă gơgrong rơđah kơ rim ƀirô, anom bruă, plơi pla đing nao pơtlaih tơnap kơ anom bơwih ƀong. Bôh tơhnal amăng 136 mơta tơlơi ră anai hmâo 126 mơta tơlơi dưi pơsir, 10 mơta tơlơi dô̆ glăi glăk dưi đing nao pơtlaih dong.

Yă Hồ Thị Kim Oanh, Khua Sang bruă pơkra jrao Lâm Thịnh Kon Tum, brơi thâo phrâo pơphun pơdŏng Sang bruă thun 2019 lĕ bưp tơlơi tơnap yua kơ klin ruă Covid-19, amăng glông jơlan yak rơgao tơlơi tơnap pơtŏng sit gơnam ba jơlan hlâo Trà sâm ƀơi anih sĭ mơdrô, Sang bruă dưi čơkă mă na nao tơlơi gum hrŏm, djru gum mơ̆ng gong gai hăng gơnong bruă gơgrong gah bruă anai mơ̆ng tơring čar Kon Tum:

 “Anom bơwih ƀong pok phun lĕ bưp lu tơlơi tơnap samơ̆ gêh gal mơn, anun lĕ tơlơi gum djru mơ̆ng hơdôm hơdră bruă tơring čar pô. Mơ-ak biă hơdôm hrơi hăng anai tơring čar hmâo pơphun laih hơdôm jơlan hơdră tô nao rai, pơtrut hăng biă ñu pơsir hơdôm tơlơi akă rơđah, tơlơi tơnap mơ̆ng anom bơwih ƀong. Jơlan hơdră kơphê anom bơwih ƀong amăng blan hlâo Sang bruă ƀing gơmơi hmâo ba tơbiă jơlan gah pơđĭ tui glông jơlan ngă rai gơnam pioh gum hrŏm amăng hơdôm sĭ mơdrô ƀơi hơdôm anih ruah gơnam tam tŏng ten hloh. Khua tơring čar hmâo lăi pơthâo laih tơlơi čang rơmang mơ̆ng ƀing gơmơi kơ Gơnong bruă kơsem min hăng hơdră phrâo măi mok. Ră anai ƀing gơmơi glăk mă bruă hăng anom hmâo tơlơi dưi pơtô pơhrăm ăt kah hăng gưl pơsit ISO".

Pran jua gum hrŏm pơtlaih djru anom bơwih ƀong pơđĭ kyar mơ̆ng tơring čar Kon Tum dưi hmâo khul bơwih ƀong glăk pơkra, sĭ mơdrô gơnam hăng pô tuh pơplai pơsit yôm. Blan 4/2023 ƀơi mông ngă Lơphet lăi pơthâo mrô bôh thâo bơkơtưn gưl tơring čar thun 2022 yua kơ Khul pơlir hơbit anom bơwih ƀong sĭ mơdrô hăng măi mok Việt Nam pơphun, Kon Tum ngă bruă ƀu hmao thâo lơm đĭ 24 črăn bơhmu hăng thun 2021 dăp tal 37/63 bôh tơring čar, ƀôn prong. Anai lĕ tal dăp dlông hloh tơring čar hmâo amăng 16 thun rơgao, kiăng bruă gum hrŏm pơtlaih tơnap djru anom bơwih ƀong pơđĭ kyar jai sit nik hloh, ba glăi bôh tơhnal, tơring čar Kon Tum glăk đing nao ngă tui lu jơlan gah pioh pơplih phrâo dong bruă tuh pơplai bơwih ƀong sĭ mơdrô, pơđĭ tui pran bơkơtưn. Hrŏm hăng anun hmâo hơdră bruă đing nao hlâo djru pơđĭ kyar kơtang kual bơwih ƀong mơnuih ƀôn sang, pok phun bruă pơčeh phrâo; pơjing tơlơi dưm kơnar amăng bruă tŭ mă ngăn drăp kơplah wah hơdôm črăn bruă anom bơwih ƀong, mơnuih tuh pơplai; pơtrut kơtang bruă pok pơhai mă yua hơdră phrâo măi mok, pơplih mrô; pơđĭ tui kơjăp mơnuih apăn bruă, mơnuih mă bruă čar hmâo pran jua klă, hmâo tơhnal yôm amăng bơwih brơi, djru anom bơwih ƀong./.