Tơlơi pơhing mơ̆ng Gơnong bruă Pơtô hăng Pơjuăt tơring čar Kon Tum brơi ƀuh, hăng sang hră gưl Muai tơring čar anai dŏ kơƀah 700 čô nai hơmâo anăn sit nik, Sang hră gưl sa kơƀah 477 čô nai pơtô, sang hră gưl dua kơƀah giăm 500 čô hăng sang hră gưl klâo kơƀah 43 čô nai pơtô. Kiăng pơsir hĭ tơlơi kơƀah anai, anom bruă Pơtô hăng Pơjuăt tơring čar Kon Tum hơmâo dăp glăi, pơmut lu sang hră mơ̆ng kơnuk kơna hăng sang hră mơnuih ƀôn sang ngă pô kiăng pơpha nai pơtô djru lăng ba hơdôm sang hră anet. Pơpha dăp bruă khul khua mua wai lăng, nai pơtô, mơnuih mă bruă kơ rim boh tơring glông, pơsir hĭ anŏ kơƀah nai pơtô ƀơi lu plơi pla hăng pơsir pơ anih rơbêh đơi nai pơtô; pơpha nai pơtô kơ rim gưl hrăm ƀơi gưl dua hăng gưl klâo laih anun truh pơ kual sa.

Ơi Thái Khắc Hòa, Khua anom Pơtô hăng Pơjuăt plơi prong Kon Tum brơi thâo, amăng  plơi prong dŏ kơƀah 160 čô mơnuih pơtô, anun ĕp hơdră pơsir lĕ:

“Dăp glăi anih pơtô, pơpha nai nao pơtô djơ̆ găl tui hluai ƀơi djop sang hră. Ngă tui hơdră pơmut sang hră raih daih, pơtum sa ƀut mơ̆ng 7 boh anih amăng anun 2 boh sang hră gưl muai hăng 5 boh sang hră gưl sa. Ngă tui pơblih nao rai khul nai pơtô mơ̆ng anih rơbêh nai nao pơ anih kơƀah nai kiăng dăp brơi djơ̆ găl plah wah djop sang hră. Hăng ƀing nai pơtô sa tơlơi hrăm kơƀah nai pơtô kah hăng Tin học, tơlơi pơhiăp Angle ƀơi gưl sa, hơmâo pơpha nao laih nai pơtô djop. Rơngiao kơ anun, anom bruă pơtô hrăm brơi nao nai pơtô Tin học, tơlơi pơhiăp Angle mơ̆ng gưl dua nao pơtô brơi gưl sa”.

Nai pơtô Cao Thanh Diễm Quỳnh pơtô tơlơi Angle ƀơi 2 boh sang hră gưl sa Kon Tum

Ƀơi Gia Lai, ră anai ăt kơƀah rơbêh 3700 čô mơnuih pơtô hrăm hră. Ơi Phạm Văn Đại-Khua anom Pơtô hăng Pơjuăt tơring glông Ia Grai brơi thâo, ră anai dŏ kơƀah giăm 300 čô nai. Ngă tui tơlơi pơtrun Hơdră pơtô hrăm djop sang hră thun 2018, thun hrăm anai 2022-2023 jing thun tal blung pơtô tơlơi hrăm Tin học hăng tơlơi Angle ta juăt lăi tơlơi Mi mơ̆ng anih 3 amăng gưl sa, pơhrua kơ tơlơi hrăm ruah mă tui anŏ kiăng kah hăng hlâo. Ƀuh rơđah tơlơi anai, ngă kơ tơring glông kơƀah nai mơ̆ng hlâo ră anai jai kraih tơnap tap hloh yua aka ƀu djop mrô nai pơtô dua tơlơi hrăm anai.

“Ră anai tơnap tap hloh amăng bruă pơtô hrăm tơring glông Ia Grai lĕ ngă tui hơdră pơtô hrăm tui hơdrôm hră phrâo tơlơi hrăm pơhiăp Angle anih 2 hăng tin học anih 3 ră anai kơƀah lu biă mă. Hăng mrô nai pơtô tơlơi Angle kơƀah ƀơi lu sang hră, 5 boh sang hră aka ƀu hơmâo nai pơtô tơlơi Angle ôh hăng 8 boh sang hră aka ƀu hơmâo nao pơtô Tin học anun tơnap biă mă”.

Ơi Nguyễn Đình Thức-Khua anom Pơtô hăng Pơjuăt plơi prong Plei Ku brơi thâo, amăng plơi prong anai dŏ kơƀah truh 600 čô nai pơtô. Kiăng pơhlôm klă kơ bruă pơtô hrăm, anom bruă pơtô hăng pơjuăt gleng nao kơ bruă dăp hơdră, ngă hơđong pơdjop nai pơtô, mơnuih mă bruă pơ anih dŏ kơƀah.

“Anom Pơtô hăng pơjuăt plơi prong hơmâo mă bruă hăng djop sang hră pioh sem glăi anih hrăm hăng dăp bruă kơ ƀing nai pơtô. Ƀơi anăp kơ tơlơi pơhing kơƀah nai lu kah hăng anun, gơmơi hơmâo bơ ră ruai hăng djop sang hră, brơi dăp bruă, pơƀut glăi anih hrăm kiăng pơkrem mrô mơnuih pơtô hơmâo anăn sit nik tui hăng anŏ kiăng đut tơhnal dưi ngă. Anom bruă Pơtô hăng Pơjuăt rơkâo đĭ djop gưl anom bruă sem lăng tơlơi pơtrun mơ̆ng djop anom bruă, kơnuk kơna pơpha djop nai pơtô ăt kah hăng mơnuih mă bruă kơ djop sang hră kiăng pơhlôm klă bruă pơtô hrăm”.

Đơ đam tơring čar Dak Lak ră anai ăt kơƀah 1.260 čô nai pơtô gưl muai truh pơ gưl klâo

Ơi Lê Duy Định-Khua gơnam bruă Pơtô hăng Pơjuăt tơring čar Gia Lai brơi thâo, ngă hrom Gơnong bruă čar tơring čar hơmâo mă bruă hăng djop tơring glông jŭ yap, lăi pơthâo hăng khua jơnum min mơnuih ƀôn sang tơring čar pơpha dăp bruă, pơphun glăi anih hrăm, pơƀut glăi lu anih hrăm kiăng hơƀot hloh tui hluai gưl hrăm. Tơdơi kơ ngă giong boh yôm phun phrâo jŭ yap glăi kơƀah nai pơtô, pơhrua brơi djop nai pơtô ƀơi djop tơring čar kiăng pơpha nao dơ̆ng 1.244 čô nai mơ̆ng Gơnong dlông jao.

“Hăng hơdôm anih hrăm gưl sa khom hơmâo 35 čô čơđai sa anih, bơ hơdôm anih gưl dua khom hơmâo 45 čô čơđai sa anih. Djop tơring glông ngă tui bruă pơmut anih hrăm pơ hơdôm sang hră phun kiăng djop mrô čơđai sang hră ăt kah hăng kiăng pơkrem kơƀah nai pơtô lu đơi. Lơ̆m pơhrua mrô nai pơtô, hrom hăng bruă pơmut lu anih glăi, dăp bruă nai pơtô djop mrô čơđai sang hră lĕ anŏ gêh găl kơ bruă pơtô hrăm ƀơi Gia Lai amra plai ƀiă mơ̆n kơƀah nai pơtô”.

Hrom hăng hơdră ngă jăng jai hăng ƀơi anăp lĕ, pơsir hĭ anŏ kơƀah nai pơtô, Gơnong bruă Pơtô hăng Pơjuăt djop tơring čar amăng kual Dap Kơdư ăt rơkâo kơ Ding jum Pơtô hăng Pơjuăt lăi pơthâo hăng Kơnuk kơna dêh čar pơhrua dơ̆ng mrô kơƀah nai. Hơmâo hơdră iâu pơmut ƀing nai pơtô, mơnuih mă bruă gah anom bruă pơtô hrăm kah hăng djru ƀing tơdăm dra hrăm bruă ngă nai pơtô lĕ prăk apah hrăm bruă, prăk huă ƀong tui Hră pơtrun mrô 116 mơ̆ng Kơnuk kơna kiăng ngă gêh găl kơ djop tơring čar huăi kơƀah mrô nai pơtô.