Rơđah biă mă ñu, tui hăng rơnoh jŭ yap mơ̆ng Jơnum min mơnuih ƀôn sang tơring čar Kon Tum brơi ƀuh hơdôm sang bruă hơmâo tơlơi dưi jao pơsir gah jơnum min mơnuih ƀôn sang tơring čar, jơnum min mơnuih ƀôn sang djop tơring glông, plơi prong, truh pơ să hơmâo pơsir samơ̆ kaih hloh hrơi pơkă truh 18 rơbâo 394 pok hră amăng mrô 235 rơbâo 871 pok hră. Lăp gleng nao biă mă ñu hơmâo 2.429 pok hră rơgao hrơi pơkă samơ̆ aka ƀu pơsir mơ̆n.

Anih mă bruă pơsir hră pơar kơ mơnuih ƀôn sang tơring čar Kon Tum

Ƀơi anăp kơ tơlơi anai, lơ 24/10, Jơnum min mơnuih ƀôn sang tơring čar Kon Tum hơmâo hră pơtrun hiăp brơi djop sang bruă pơsir hră pơar gah Jơnum min mơnuih ƀôn sang tơring čar wai lăng; Anom bruă wai lăng anih bơwih ƀong huă; Jơnum  min mơnuih ƀôn sang djop tơring glông, plơi prong khom pơsir tañ hơdôm hră pơar dŏ glăi hlâo kơ lơ 5/11/2022. Laih dơ̆ng, Khua jơnum min mơnuih ƀôn sang tơring čar Kon Tum ăt pơtrun hiăp kơ djop sang bruă khom ngă bruă khut khăt, anăm ngă amưng, tơnap kơ mơnuih ƀôn sang, pơsir hră pơar khom ngă hmar djơ̆ tơlơi phiăn laih anun laiw glăi tong ten hăng khua mua git gai sang bruă tơdah soh glăi khom rơkâo tơlơi pap mơnuih ƀôn sang, sang bruă sĭ mơdrô djơ̆ hăng Hră pơtrun mrô 61/2018 mơ̆ng Kơnuk kơna.