Akŏ blan 3 laih rơgao, Ping gah, gong gai kơnuk kơna hăng mơnuih ƀôn sang să Yaly, tơring glông Sa Thầy tŭ mă hră pơtrun mơ̆ng Jơnum min mơnuih ƀôn sang tơring čar Kon Tum tŭ yap să Yaly ngă djơ̆ tơhnal pơkă man pơdong plơi pla phrâo laih. Ơi A Thuaih, Khua git gai ping gah, ngă khua plơi Čư̆, să Yaly ƀuh mơak hăng boh tơhnal dưi ngă anai. Yua lu thun rơgao, ñu  yơh ba jơlan hlâo hrŏm hăng ƀing adơi ayong mă bruă jak iâu 262 boh sang anŏ plơi Čư̆ pơblih tơlơi pơmin, hơdră mă bruă kiăng pơđĭ kyar bơwih ƀong rah hăng ngă hrŏm bruă amăng plơi, gum pran jua man pơdong plơi pla phrâo. Ơi A Thuaih brơi thâo, amăng bruă jak iâu ană plơi, kiăng biă mă tơlơi sơ̆n pran jua, thâo hluh djơ̆ rơ-ua amăng bruă mă hăng pơsir tơlơi hơmâo:

“Hnang blung lu mơnuih aka ƀu thâo hluh, laih anun dŏ hŭi samơ̆ laih thâo hluh gơñu pơmin nao kơ bruă tŭ yua hrŏm abih bang. Ƀing mơnuih ping gah amăng plơi ăt hur har hyu pơtô lăi, jak iâu ană plơi pla khin ngă tui hơdră mă bruă phrâo, ngă hmua pla pơjing hăng đing nao kơ bruă pơtrut ană bă hrăm hră”.

Tơdơi kơ 12 thun sơ̆n pran jua kiăo tui tơhnal pơkă man pơdong plơi pla phrâo, să Yaly, tơring glông Sa Thầy hơmâo iâu pơtum, pơčruh 30 klai prăk pơkra jơlan nao rai amăng plơi, man pơkra bơnư̆ pơkong ia, kueng hmua, hnoh ia rô pling amăng hmua, man pơdong sang hră, anih hrăm hăng djru mơnuih ƀôn sang ană plơi pla ngă hmua pla pơjing. Hrŏm hăng anun, ƀơi 3 boh plơi djuai ƀiă: Plơi Čư̆, plơi Tum hăng plơi Čơ ră anai ƀu hơmâo sang tơ̆I dơ̆ng tah. Mrô sang anŏ ƀun rin trun hrŏ 8%, rơnoh pơhrui glăi pơkă dưm dưm sa čô mơnuih sa thun mă bruă hơmâo 42 klăk prăk. Khua git gai ping gah să Yaly, ơi Phan Chí Thiện lăi pơtong, kiăng ngă gêh găl pơblih phrâo hăng tañ truh bruă man pơdong plơi pla phrâo sit mơ̆n hơmâo tơlơi glăm ba mơ̆ng ƀing mơnuih ping gah, khua git gai ping gah 3 boh plơi mơnuih djuai ƀiă hur har biă mă, kah hăng Khua ping gah plơi Čư̆, A Thuaih :

“Amăng bruă man pơdong plơi pla phrâo ăt kah hăng lu bruă mă pơkŏn amăng să, A Thuaih pok pơhai bruă mă hmar biă mă. A Thuaih git gai plơi pla, sang anŏ ană plơi hlơi hơmâo drông war krư̆ rơmô aka ƀu hơdjă rơgoh lĕ, brơi rit đuăi pơkra phrâo. Jak iâu, pơtô pơblang kiăng ană plơi pơyơr lŏn sang đang hmua djơ̆ anih čuk pơkra jơlan pioh pok jơlan plơi pla phrâo. Laih anun hrŏm hăng khua mua ping gah pla bơnga ngă pơhiam anih dŏ jum dar hơmâo mơta mơda bơnga hiam rơgoh hơdjă”.

Ƀuh rơđah khua mua git gai ping gah djop plơi pla, mơnuih djuai ƀiă ƀơi tơring čar Kon Tum hơmâo tơlơi glăm ba prong biă mă man pơdong plơi pla, akŏ pơdong ping gah laih anun ngă tui bruă mă bơwih ƀong huă, mơnuih mơnam ƀơi kual plơi pla. Tơlơi anai jai hrơi dưi ƀuh ngă tui jơlan hơdră pơtrun tong ten biă mă, djơ̆ hăng anăn Khua git gai ping gah hlong ngă khua plơi, truh ră anai tơring čar Kon Tum hơmâo 410/756 čô khua ping gah plơi, ngă rah khua plơi hlao. Khua git gai ping gah, ơi A Sao, ngă khua plơi Kon Teo Đak Lâp, să Đak Long, tơring glông Đak Hà brơi thâo, bruă lu tui samơ̆ ăt gêh găl mơ̆n git gai, pơčrâo bruă ngă tui amăng plơi. Mơ̆ng bruă ba jơlan hlâo hăng git gai bruă, ơi A Sao pô nao hlâo, 230 boh sang anŏ mơnuih ƀôn sang hăng 1.200 čô mơnuih djuai ania Sedang (Hơdang) plơi Kon Teo Đak Lâp, hơdôm thun giăm anai hơmâo pơblih hĭ đơ đam pla hơbơi plum, hmua kơdư pioh pla kơphê, pla kơsu hăng phun boh troh:

“Tơlơi glăm ba jing mơnuih apăn akŏ ƀơi plơi, kâo gir run jak iâu ană plơi pla hlơi hơmâo đang sang prong lĕ pơphun rông hlô mơnong, pla boh troh. Ta khom ngă hlâo, hnun kah ta dưi lăi kơ mơnuih ƀôn sang. Ngă hlâo brơi mơnuih ƀôn sang ƀuh, hla tui djru kơ plơi pla ta thâo thăi, pơblih tui ƀơƀrư̆ pơklaih ƀun rin hơđong kjăp”.

Kiăng pơđĭ tui tơlơi gơgrong ba mơ̆ng ƀing ngă khua git gai ping gah plơi pla mơnuih djuai ƀiă amăng bruă man pơdong plơi pla phrâo, lu anom bruă, khul ping gah plơi pla amăng tơring čar Kon Tum đing nao biă mă kơ bruă pơtô hrăm, pơtrut pơsur hăng hơduah ĕp tơlơi thâo thăi amăng bruă mă kơ ƀing khua ping gah plơi, kiăng thâo hluh jơlan hơdră, tơlơi pơtrun mơ̆ng dlông, kiăng djop pô khom thâo tong ten pơčrâo ba mơnuih ƀôn sang amăng bruă mă. Ơi Trần Ngọc Trực, Khua git gai ping gah să Đak Long, tơring glông Đak Hà brơi thâo, hơdră mơ̆ ping gah să ngă tui kiăng pơtrut tơlơi gơgrong ba mơ̆ng 5 čô khua ping gah plơi mơnuih djuai ƀiă amăng bruă man pơdong hăng pok pơhư prong pơđĭ kyar bơwih ƀong huă sang anŏ:

“Kơnang kơ bruă git gai, pơčrâo ba, anom bruă ping gah să, pơphun lu wơ̆r brơi ƀing khua mua ping gah plơi hrăm hơdôm hơbô̆ bruă hiam, djơ̆ lăp. Truh mông anai, pok pơhai ngă tui 5 hơdră pơđĭ kyar bơwih ƀong huă pơđĭ tui rơnoh pơhrui glăi kơ mơnuih ƀôn sang djuai ƀiă. Mrô sang anŏ ƀun rin hrŏ tui lu biă mă pơkă hăng hơdôm thun hlâo adih. Mrô sang anŏ đĭ đăi gŏ amŏ lĕ lu tui mơ̆n”.

Truh ră anai, tơring čar Kon Tum hơmâo 44 boh să dưi tŭ yap jing să ngă djơ̆ tơhnal pơkă plơi pla phrâo, amăng anun 4 boh să dưi ngă djơ̆ tơhnal pơkă plơi pla phrâo hiam hloh hăng sa boh să tui gru plơi pla phrâo. Mah tui anun, lu plơi pla djuai ƀiă ƀơi tơring čar Kon Tum dŏ pơ kual ataih, kual asuek samơ̆ truh ră anai hơmâo 45 boh plơi pla, dưi ngă djơ̆ tơhnal pơkă plơi pla phrâo. Kiăng kơ bruă man pơdong plơi pla phrâo amăng tơring čar hơmâo lu tơlơi pơblih phrâo hloh, tơlơi hơdip mơda, bruă mă mơ̆ng mơnuih ƀôn sang đĭ tui lĕ ƀing ba jơlan hlâo kah hăng pô djă hla gru nao hlâo lĕ ƀing khua ping gah plơi pla, ƀôn ƀut yơh phun.