Abih bang lŏn mă glăi dưi hmâo Jơnum min mơnuih ƀôn sang tơring čar Kon Tum jao kơ Jơnum min mơnuih ƀôn sang tơring kual Đăk Glei, tơring glông Đăk Glei wai lăng tui tơlơi pơkă. Sang bruă pơkra drai ia pơkĕ apui lơtrik VGR Ngọc Linh hmâo bruă gơgrong jao glăi lŏn, tơdah ƀu ngă tui amra pơgô̆ tui tơlơi pơkă amăng tơlơi phiăn.

Bôh than ba truh bruă Jơnum min mơnuih ƀôn sang tơring čar Kon Tum ba tơbiă tơlơi pơsit mă glăi abih bang lŏn hmâo brơi kơ Sang bruă pơkra drai ia pơkĕ apui lơtrik VGR Ngọc Linh apah lŏn, jao lŏn pioh pơdŏng drai ia pơkĕ apui lơtrik Đăk Ruồi 2 hăng Đăk Ruồi 3 bơdjơ̆ nao hơdôm tơlơi ngă soh mơ̆ng Sang bruă anai, kah hăng: kaih ba lŏn mă yua rơgao kơ 24 blan bơhmu hăng rơnoh čih amăng rơwang bruă tuh pơplai; ƀu ngă hră rơkâo pơhrư̆i hrơi mă yua; pơdŏng anom git gai bruă, kual git gai rơwang bruă rơnưh, pok jơlan pơdŏng pơkra... dŏng gah rơngiao kual lŏn hmâo jao, brơi apah./.