Tơdơi kơ lu hơdră ngă tui pok pơhai lăp, kiăng pơgăn anŏ ngă rơngiă kông ngăn, lŏn glai hăng pơgăn duh jia ƀu djop mơ̆ng bruă sĭ mơdrô čuah, rơga mă amăng ia krông, phrâo anai, jơnum min mơnuih ƀôn sang tơring čar Kon Tum hơmâo ngă hră pơtrun kơ djop gơnong bruă, gong gai kơnuk kơna djop tơring glông, plơi prong kơtưn git gai wai lăng khul rơdêh, song nan, ƀattô, măi mok hyu hrip mă čuah, rơga amăng ia krông. Kiăng pơgăn anŏ ngă rơngiă soh sel hăng duh jia ƀu djop mơ̆ng bruă sĭ mơdrô, mă čuah, rơga amăng ia krông.

Jơnum min mơnuih ƀôn sang tơring čar jao kơ anom bruă mă jia khom hyu sem lăng, pel ĕp bruă ngă tui djơ̆ tơlơi phiăn mă jia, hră pơar tla prăk hăng tơlơi pơhing hyu mă čuah laih anun khom duh jia kơ kơnuk kơna djop, brơi djop sang bruă, sang anŏ mơnuih ƀôn sang ngă bruă amăng bruă hyu mă čuah, rơga thâo tong ten; pơsir khut khăt hlơi pô ngă soh glăi hăng tơlơi phiăn duh jia, ƀu apah prăk hăng ƀu ngă djơ̆ hră tla prăk tui kơnuk kơna pơtrun, khom ƀuh tañ, pơsir hmao kru hơdôm anom bruă ngă soh laih anun jŭ yap djơ̆ tơpă tum num.