Hăng đơ đam glai hlăk hơmâo ră anai truh 547.700 ha, hrŏm hăng 61.000 ha glăi kyâo pla, ƀơi lu anih amăng tơring čar Kon Tum, ră anai hlăk truh bơyan không phang thu krô, amuñ biă hơmâo tơlơi truh apui ƀong glai. Ƀơi anăp kơ tơlơi hŭi apui ƀong glai, Jơnum min mơnuih ƀôn sang tơring čar Kon Tum git gai kơtưn ngă tui lu hơdră ječ ameč pơhlôm, pơgang apui ƀong glai.

Tui hăng anun, jơnum min mơnuih ƀôn sang tơring čar Kon Tum pơtrun hiăp brơi djop gưl anom bruă kơnuk kơna, ƀing tơhan kông an, ling tơhan blah ngă, anom bruă pla kơsu amăng lŏn ngă hmua hăng lu anom bruă, sang anŏ, plơi pla pô glai jao wai lăng hyu sem lăng, pơtong glăi tong ten, ngă hơdră pơhlôm, pơgang, hơprah apui amăng bơyan không phang adai pơđiă kơtang; djru prăk kơ djop anom bruă, plơi pla prăp lui pơgang apui ƀong glai tui hơdră pơphun pă mơta bruă sa anih, pơtong glăi rơđah djop anih, kual hŭi hơmâo apui ƀong glai laih anun brơi tơhan, mơnuih wai lăng glai nao ĕp, hyu tir đah mơ̆ng hmao pơsir mơtam tơdah hơmâo tơlơi truh apui ƀong glai.