VOV4.Jarai - Hăng 10 hrơi hơduah ĕp kơđi, pơsit hăng mă pơkŏng mơnuih “Ngă soh tơlơi phiăn mă yua, pơgang glai hăng kyâo”, Kông an tơring glông Sa Thầy hơmâo apah bơni tañ mơtăm. Mơguah lơ 20/9/2022, ƀơi Kông an tơring glông Sa Thầy, ơi Dương Văn Trang, Ding kơna Ping gah dêh čar, Khua git gai Ping gah tơring čar, Khua Jơnum min pơ ala mơnuih ƀon sang tơring čar Kon Tum hơmâo apah bơni 20 klăk prăk kơ grup kông an tơring glông Sa Thầy. Tŭ mă hră pơ-ar ngă kơđi mơng Anom bruă wai lăng glai tơring glông, amăng rơbêh 10 hrơi rơgao, Kông an Sa Thầy hơmâo hyu ĕp, pơsit bruă, hơmâo mă hơdôm čô mơnuih amăng bruă “Ngă soh tơlơi phiăn mă yua, pơgang glai hăng kyâo”, ƀơi glai mrô 6, kual glai 692, să Mô Rai, tơring glông Sa Thầy, gah kual glai yua Kông ti TNHH sa ding kơna wai lăng glai Sa Thầy. Ră anai, Kông an tơring glông Sa Thầy glăk iâu pơthưr ƀing ngă soh pơkŏn nao pơhai, đah mơng ngă pơgiong hră pơ-ar ngă kơđi.

Ơi Dương Văn Trang bơni kơ bruă hơduah ĕp kơđi mơng tơhan kông an Sa Thầy.

Khua git gai Ping gah tơring čar Kon Tum kiăng Khua mua Ping gah Jơnum min mơnuih ƀon sang tơring čar, Ping gah Kông an tơring čar, Khul khua apăn bruă git gai Ping gah tơring glông Sa Thầy pơđĭ tui tơlơi gơgrong bruă, wai lăng, pơgang glai rưng ƀơi tơring glông; pơđĭ tui tơlơi gơgrong bruă mơng pô wai lăng glai; hyu tir na nao, kiăo mă ƀing ngă soh, bơtơhmal tui hăng tơlơi phiăn mơtăm hăng ƀing ngă soh tơlơi phiăn wai lăng đang glai...

Siu H’Mai: Pơblang