Pơphun amăng 2 hrơi dong mơng lơ 20-21/9, Jơnum Khul mơnuih ngă hmua tơring čar Kon Tum tal IX, rơwang thun 2023-2028 hơmâo pơsit tong hơdôm hơnong pơkă, hơdră bruă akŏ phun kơ bruă mă amăng Khul hăng hơdôm tơlơi pơphun ngă bruă kơ mơnuih ƀon sang 5 thun pơ anăp. Jơnum khul mơnuih ngă hmua tơring čar Kon Tum tal IX hơmâo 277 ƀing nao jơlan sit nik pơ ala brơi rơbêh 65.000 čô ding kơna mơnuih ngă hmua amăng tơring čar.

Rơwang thun 2023-2028 khul pơsit tong lu hơnong pơkă yôm phun, tơlơi gir run pơjing Khul mơnuih ngă hmua djop gưl amăng tơring čar hơđong kjăp djop mơta; pơtô pơblang, pơtrut pơsur mơnuih ngă hmua pơsĭ kyar, man pơdong plơi pla phrâo; pơgang ba tơlơi dưi djơ̆ tơlơi phăn kơ ding kơna; hrưn đĭ tal pơplông “Mơnuih ngă hmua pơplông bơwih ƀong ngă đang hmua rơgơi, thâo gum pơgôp djru tơdruă hrưn đĭ pơdrong asah hăng pơhrŏ trun ƀun rin” pơlir hăng bruă pơtrut “Ngă pơplih tơlơi pơmĭn, bruă mă mơng mơnuih djuai ania ƀiă, kiăng mơnuih djuai ania ƀiă hrưn đĭ pơklaih mơng ƀun rin hơđong kjăp”, pơgôp pơjing tơring čar Kon Tum pơđĭ kyar tañ hăng hơđong kjăp. Jơnum khul mơnuih ngă hmua tơring čar Kon Tum tal IX, rơwang thun 2023-2028 plĕ hră ruah khul apăn bruă rơwang phrâo hơmâo 32 čô. Ơi Nguyễn Quang Thủy hơmâo ruah mơnuih ngă khua apăn akŏ amăng Khul ngă hmua tơring čar Kon Tum.