Tơlơi lu mơnuih apăn bruă tơhan pơgang glai rưng ƀu gưt mă bruă, rơkâo pơdơi bruă dưi hơmâo Anom bruă tơhan pơgang glai rưng tơring čar Kon Tum lăi lĕ, yua anih mă bruă gleh tơnap, bruă mă glăm ba prong laih anun tơlơi djru aka ƀu lăp ôh. Ƀơi anăp kơ tơlơi lu mơnuih rơkâo pơdơi bruă wai pơgang glai rưng ƀu gưt mă bruă hăng ngă hră rơkâo pơdơi lu, dưi thâo Jơnum min mơnuih ƀôn sang tơring čar Kon Tum hơmâo ngă hră rơkâo đĭ kơnuk kơna brơi hơmâo jơlan hơdră djru phara kơ tơhan pơgang glai rưng laih anun mơnuih ngă bruă pơgang glai rưng hnun mơ̆n.

Hrŏm hăng anun, Jơnum min mơnuih ƀôn sang tơring čar Kon Tum ăt git gai djop sang bruă tơhan pơgang glai rưng khom hơmâo hơdră jao lŏn glai kơ mơnuih apăn bruă tŭ mă wai lăng, laih dơ̆ng pơtrut pơđĭ kyar bơwih ƀong huă, pơblih rơnoh pơhrui glăi kơ pô wai lăng glai kiăng dưi hơdip mơda hơđong, gir run bruă pơgang glai kyâo amăng bruă mă.