Ơi Trương Văn Quốc, 56 thun, dŏ ƀơi să Ea Ktur, tơring čar Dak Lak, phrâo blơi rơdêh ôtô 5 boh grê đĭ, arăng sĭ glăi. Giong ngă hră pơar mơ̆ng pô hơđăp ƀơi sang bruă tơhan pơlih jơlan glông, ñu đĭ nao rơdêh lăi pơthâo ƀơi sang bruă Kông an să Ea Ktur pioh ngă hră pơar pơblih anăn pô, čih glăi anăn phrâo. Mah lu thun laih hăng ƀu hruaih ôh ba yua boh thâo ia rơgơi mrô internet, samơ̆ ơi Quốc dưi hơmâo ƀing kông an să pơtô, pơčrâo brơi hơdră mut ĕp, čih anăn tui jơlan điện tử. Yua kơ anun, abih bang hơdră ngă hră pơar, čih anăn pô phrâo kơ rơdêh ñu, ngă hmar biă mă. Ơi Trương Văn Quốc lăi.

 “Kâo dưi hơmâo ƀing kông an ngă hră pơar pơtô pơčrâo brơi hơdră čih anăn amăng plang internet, čih pơhaih duh jia blơi rơdêh hăng ĕp glăi mrô không rơdêh, mrô măi. Ră anai, kâo duh jia, gư̆ mă mrô phrâo hăng tơguan 2-3 hrơi đôč. Ƀuh rơđah tơhan kông an să pơtô brơi tong ten biă mă, hơdră ngă hră pơar dưi ngă tañ hmar hăng amuñ biă mă”.

Ayong Nguyễn Minh Tuấn, sa čô mơnuih mă bruă amăng sang bruă bơwih ƀong sĭ mơdrô rơdêh ôtô ƀơi Dak Lak brơi thâo, rim blan sang bruă gơñu sĭ mơ̆ng 40-50 boh rơdêh ôtô phrâo. Hlâo adih, ngă hră pơar čih anăn pô hăng gư̆ mă mrô rơdêh khom mơ-it djop hră pơar ƀơi sang bruă tơhan kông an tơring čar ƀudah tơring glông, rơngiă sui hrơi mông biă mă. Mơ̆ng blan 3 thun anai, hơdră ngă hră pơar anai amuñ gêh găl hloh yua hơmâo črăn bơnah plang internet amăng điện tử, pơtruh nao rai tơlơi pơhing hăng kông an să laih anun djop sang bruă sĭ mơdrô. Bruă rơkâo čih anăn rơdêh ră anai kơnong rơngiă hơdôm mông đôč, ƀing tuai blơi rơdêh tơguan 2-3 hrơi hơmâo yơh hnăl hlă mrô rơdêh, pơhrua hăng bruă tơguan abih sa wơ̆t hrơi tơjuh hăng lu mơnuih kah hăng hlâo.

 “Ră anai huăi kuah ĕp mrô không, mrô măi hrup hlâo ôh, yua kơ sang măi pơkra rơdêh arăng tep laih mrô không, mrô măi amăng hră pơar rơdêh. Ƀing tuai blơi rơdêh kơnong čih pơthâo tơlơi pơhing drơi jăn ñu pô, mrô kăn kươk, app čih anăn điện tử hơnơ̆ng 2, kiăng gơmơi čih anăn duh jia blơi rơdêh laih anun gơñu amra tŭ mă tơlơi pơhing lăi glăi amăng măi telephôn gơñu pô. Gơñu mơ-it mă prăk ƀudah ba  nao prăk jia tui hluai hơdră gơñu ngă, giong anun gư̆ mă anŏ pơtơbiă mrô rơdêh amăng măi telephôn ñu pô mơ̆n, tui hăng plang arăng pơčrâo brơi. Bruă gư̆ mrô, pơhaih anăn duh jia, kơnong rơngiă 2-3 mông đôč tơdơi kơ anun ngă giong laih akŏ klôn jing giong yơh. Mơnuih ƀôn sang čih anăn pơthâo anih dŏ, mrô sang, arăng mơ-it amăng sang dăng kông ba brơi tơl sa”.

Thượng uý Nguyễn Tất Diệu, mơnuih apăn bruă wai lăng čih anăn rơdêh prong mơ̆ng să Ea Ktur lăi, rim blan sang bruă gơñu pơsir brơi 200 pok hră rơdêh thut hăng 60 pok hră rơdêh ôtô, rơdêh čuk, rơdêh tuah....Tơdơi kơ lui hĭ sang bruă kông an gưl tơring glông mơ̆ng lơ 1/3, abih bang hơdră ngă hră pơar phrâo, pơblih hră pơar, anăn pô rơdêh....lêng kơ ngă tui amăng plang tơlơi pơhing komputer hăng măi telephôn rơgơi. Mơ̆ng lơ 1/7 phrâo anai, sang bruă gơñu hơmâo pơđĭ tui mrô mơnuih mă bruă tŭ mă hră pơar hăng ngă brơi hră pơar rơdêh tañ hloh. Thượng uý Diệu lăi dơ̆ng, lơ̆m mơnuih ƀôn sang juăt laih hăng bruă čih anăn ngă hră tui jơlan online, trực tuyến, thâo hơdră ngă hră pơar phrâo, bruă ngă tui amuñ hloh čih anăn pơblih hră pơar rơdêh tañ biă mă:

“Rơdêh phrâo ră anai dưi čih anăn pơhaih amăng măi komputer online ƀudah amăng măi telephôn rơgơi. Lơ̆m blơi rơdêh mơ̆ng sang sĭ mơdrô, mơnuih ƀôn sang ngă hră pơar duh jia online amăng măi telephôn; anom bruă kông an amra tŭ mă hră pơar, pơsir hăng mơ-it glăi boh tơhnal laih pơsir. Mơnuih ƀôn sang tơguan đôč hăng tŭ mă čih anăn pơ sang tŭ mơ̆n. Hăng rơdêh sô, rơdêh pơblih anăn pô, blơi glăi rơdêh djah ƀudah pơblih rup hơbô̆ rơdêh, mơnuih ƀôn sang khom djă ba hră pơar hăng đĭ rơdêh nao pơ sang bruă kiăng gơmơi ĕp glăi rơdêh anun hiư̆m pă. Tơdah rơdêh anun arăng huăi khuer mrô không, mrô măi, ia pơtuir mia huăi pơblih ôh hăng hră pơar hơđăp amra dưi pơsir brơi laih anun pơtô brơi ngă hră čih anăn phrâo kơ rơdêh".

Tơdơi kơ ha mơkrah blan pơmut glăi tơring čar, Dak Lak ăt čih pioh lu hơdômrơtuh boh rơdêh ôtô hăng rơdêh thut nao čih anăn phrâo, ngă hră pơar rơdêh. Mah mrô rơdêh lu, pô ñu nao čih anăn jai hrơi kơniă, mơnuih mă bruă kơƀah, samơ̆ hăng pran jua glăm ba gơgrong amăng bruă mă bơwih brơi kơ mơnuih ƀôn sang, kông an tơring čar Dak Lak ăt ngă bruă hăng boh tơhnal klă čih anăn hră pơar rơdêh kơ mơnuih ƀôn sang. Lu tơlơi pơblih phrâo amăng bruă ba yua ia rơgơi mrô ƀu kơnong klah čun ƀiă mông đôč ôh, dŏ djru pơhrŏ ƀiă prăk rô nao rai, laih anun pơdah rai pran jua mă bruă “Yua kơ mơnuih ƀôn sang yơh khom bơwih bơwang brơi” mơ̆ng tơhan kông an mơnuih ƀôn sang.