Đơ đam tơring čar hơmâo 41 boh sang dưi djru man pơdong phrâo, amăng anun kông an tơring čar pô gơgrong ba man pơdong 27 boh sang, truh abih lơ 7/1/2026 ngă giong laih, jao glăi abih bang sang phrâo anun kơ mơnuih ƀôn sang. Lơ̆m pok pơhai man pơdong, ƀing khua mua, ling tơhan kông an  tơring čar hơmâo djru hrŏm 33.620 hrơi bruă, kơnong kơ tơhan pơlih blah hơdeč hăng tơhan pơgang rơnuk rơnua ƀơi plơi pla lĕ djru 1.200 hrơi bruă, lu khua mua, ling tơhan mă bruă pơblih nao rai hrơi mlam, pơđĭ tui gưl mông mă bruă, kiăng tañ giong, anih dŏ, anŏ ƀong huă lĕ ĕp mă pô, pơkleč mă mơ̆ng prăk blan đôč.

Hrŏm hăng rơnoh prăk mơ̆ng Ding jum kông an djru, kông an tơring čar jak iâu mơnuih tơpuôl pơčruh hơmâo 622 klăk prăk, hrŏm hăng djru ba čuah boh pơtâo, simăng ƀrik man pơdong hăng djru ba mơnong ƀong huă. Đĭ pơhiăp ƀơi mông jơnum, Thiếu tướng, Trương Minh Đương, Khua tơhan kông an tơring čar Lâm Đồng lăi pơtong, bruă mă jao hơmâo ngă giong laih, dưi bang bơngač amăng pran jua thâo pơdjru ba “mông mơnuih ƀôn sang kiăng, tơnap tap truh, hơmâo tơhan kông an mơtam”.